ژنێک کە مێردەکەی ئەنفالکراوە: کاک هەوراز فریام بکەوە ماڵ وێران بووم

ئاڤا نیوز

ژنێکی بەتەمەن، لە گەڕەکی سەنگاوییەکانی ناحیەی شۆڕش، کە مێردەکەی ئەنفال کراوە و لە رۆژی لافاوەکەدا هەموو ماڵ و حاڵەکەی وێران بووە، داوا دەکات کەناڵی ئاڤا و هەوراز گوڵپی و خێرخوازان بە هاوارییەوە بێن و لەو ژیانە سەختە دەربازی بکەن.

 

چیرۆکی سەرەکی: دایە خاوەر، ژنێکی پاشماوەی ئەنفالە و لە لافاوەکەی 9-12-2025 هیچ شتێکی بۆ دەرنەچووە و خۆی تەندروستی باش نییە و ناتوانێت بڕوات بۆ ناو قەرەباڵغییەکان و هاوکارییەکان وەرگرێت، وتی: بڕوانە ماڵەکەم، ئەوەی خاوەر هەیەتی لێرە ئەیبینی فڕێدراوە یان ئاو بردوویەتی.

هەروەها وتی: ژنێکی لێقەوماوم، پێشتریش خەڵک پارەی بۆ کۆکردوومەتەوە کە نەشتەرگەریی ئەژنۆکانم کردووە و نەخۆشی درێژخایەنم لەگەڵە، هەر بۆیە هیچ دەسەڵاتێکم نییە و هیچ شک نابەم و داوا لە خێرخوازان ئەکەم فریام بکەون.

 

داواکاریی: دایە خاوەر، دەیوت، ئاو لەناو پلاکی کارەبای ماڵەکەمدایە، چەندین ساڵە بێ کەس و بێ حاڵم، خانووی خۆم نییە، خەڵک لە ڕای خوا لەم شوێنەدا جێگەی کردوومەتەوە و ژیانم پێکەوەنابوو، بەڵام لافاو ئەم ماڵەشی لێ تێکدام، هەر بۆیە تاکە هیوام هەوراز گوڵپییە و بەدەم هاوارمەوە بێت و خانوویەکم بۆ بکات، ئیتر هیچی ترم ناوێت، لە ڕێی خوا لەم تەنگانە و لەم قوڕە دەرم بکەن.

 

ئەمەش بزانە: ئەو ژنە کچێکی هەیە کە باوکی خۆی نەبینیوە، چونکە چەند مانگێک پاش ئەنفالکردنی باوکی لەدایک بووە، لەبەرئەوە بژێویی پەیداکاریان نییە و لەو خانووە وەکو خێر جێگەیان کراوەتەوە و کرێیەکی کەمی لێ وەردەگرن، خۆی دەڵیت: مانگی وا هەیە 50 هەزار بۆ 70 هەزار کرێ دەدەم و هەندێک جار لەبەرئەوەی ئەو پارەیەشم نییە خاوەن ماڵەکە کرێم لێ ناسەنێت.

 

باکگراوند: ناحیەی شۆڕش لە سەروەختی جێبەجێکردنی پرۆسەی ئەنفال 1987 لەلایەن حیزبی بەعسەوە وەکو کۆمەڵگەیەکی نیشتەجێبوونی زۆرەملێ بونیادنرا، دواتریش کەسوکاری ئەنفالکراوەکانیان تێدا نیشتەجێکرد،  ئاستی گوزەران و ژیانی خەڵکەکەی لە دۆخێکی خراپدایە و پێویستیان بە زۆرترین هاوکاریی و بەدەمەوەبوون هەیە.

 
بۆ کۆمەککردن:  ئاڤا میدیا کامپەینێکی گەورەی بۆ کۆکردنەوەی هاوکاری بۆ لێقەوماوانی لافاوەکەی چەمچەماڵ و دەوروبەری ڕاگەیاندووە. 

 

خێرخوازان، سەرمایەداران، وەبەرهێنەران چین و توێژە جیاوازەکان، دەتوانن بە سێ ڕێگای جیاواز هاوکاریی بگەیەننە کامپینەکەی ئاڤا:
پەیوەندی بکەن بەم ژمارانە؛

07701718885 

07508035020
 
 - ناردنی پارە لەڕێگەی کیو ئاڕ کۆدی (FIB)

گەیاندنی هاوکاری بە ئۆفیسی سەرەکی ئاڤا میدیا لە ڕێگای سەرەکی هەولێر - پیرمام، پشت فیردەوس سیتی.