ئەوەی لافاو سەر ئاوی خست!

لافاوی چەند ڕۆژی ڕابردوو زەرەر و زیانی زۆری لێکەوتەوە و گیان و ژیان و  یادەوەری و جوانی و پێویستییەکانی ماڵ و حاڵی هەزاران مرۆڤی ژێر ئاو خست و ڕاماڵی ، بەڵام ئەگەر لە چەند گۆشەیەکی ترەوە بڕوانینە ئەم لافاوە، دەبینیین بەپاڵ سەدان دیمەنی ناخهەژێن و تاڵ و بێ بەزەیی ناو قوڕولیتەوە، چەند ڕاستییەکیشی بۆ سەر ئاو خستین :

1. هەواڵ هەیە کە نیشتنەوەی لافاوی بەهێز و کەفچڕێنی زێی گەورە، لە پاش چەندین مانگ، لە دووریی 30 کیلۆمەترەوە تەرمی جوانەمەرگ: مامۆستا (ئاڤیستا بەرزنجی) ‌‌ـی سەر ئاوخست و دۆزرایەوە. بەوەش خەمی (گۆڕ ونی) و بێ سەروشوێنیی (بووکی ڕووبار) دواییهات.

2. لافاوی وێرانکەر، جوامێری و بەرزیی بەهای هاوکاریی لە ناو لیتەی خەمساردی و بێباکی و خۆخۆری و شار و شارچێتی ڕزگارکرد و (گەوهەری)  کوردبوون و مەردبوونی خەڵکی سادەی کوردستان، دارا و نەدار، سۆران و بادینان، گەورە و منداڵی سەر ئاو خستەوە !

3. ئەم لافاوە و لێکەوتەکانی، ڕووی گەشی ڕاستەقینەی میدیای نیشتمانی و خزمەتکاری خەڵکی لەناو چڕە دووکەڵی ئاژاوەگێڕی و شەڕە جوێنی میدیای پۆپۆلیستی ڕزگارکرد و دایە بەر هەوای پاکژ و تیشکی خۆری ئومێد و تریفەی مانگی دڵنیایی کوردستان !

4. لەناو گۆمی مەنگ و لێڵی بێ مۆراڵی و بێ پلانی و بێ بەهرەیی سەدان زۆربڵێ و خۆنمایشکاری سەر شاشە و ناو فەیسبووک و پشتی مایکی ڕەنگاوڕەنگدا، بەهرە و توانا و لەخۆبوردوویی کەسانی داهێنەر، سەر ئاو کەوتن . کەسێکی وەک (سەرپەرشتیاریی گشتیی ئاڤامیدیا)، بوو بەپێشنموونەی گەنجی لێهاتووی کورد کە (لەتوانایدایە قەیران بگۆڕێت بە دەرفەت و دەسپێشخەری). هەموو بێژەر و پێشکەشکار و پەیامنێر و کامێرامان و گشت کارمەندانی ئاڤا و گەنجانی خۆبەخشی کوردستان فاوندەیشن، پێشەنگ و نموونەی هەرەجوانی ئەو نیشتمانپەروەرییەن کە داگیرکەر و دەستوپێوەندەکانی دەیانەوێت بیانکەن بەژێر تەپوتۆزی بێ ئەرزشکردنی کوردایەتی و جوامێرییەوە.

5. شاڵاوی لافاوی لەناکاوی تووڕە و بەهەڵمەت، ڕاستیی ژیانی تاڵ و پشتگوێخراوی دەیان هەزار هاونیشتمانیی ناوچە کارەساتبارەکانی سەر ئاو خست، کە دەیانساڵە کراوە بەژێر قوڕ و لیتەی خەمساردی و بێ باکیی ئیدارەدانێکی خراپەوە و بۆ یار و نەیار ئاشکرابوو خەڵکی قوربانیدەری ئەو دەڤەرە لەچی و لەکێ و بۆچی تووڕەن!