خێزانێکی ئاوارەی تورکمان لە چەمچەماڵ بۆ ئاڤا: چۆ‌غ چۆغ مەمنونەم

ئاڤا نیوز

ئەمڕۆ، تیمی ڕۆژنامەوانیی ئاڤا میدیا سەردانی ئەو ماڵە ئاوارە تورکمانەیان کردەوە کە پاش لافاوەکەی چەمچەماڵ بەسەریان کردبوونەوە و مژدەی دەستەبەرکردنی پێداویستی ناو ماڵ و کرێی خانووەکەی بە خێزانەکە درا و خاوەنی ماڵەکەش بە زمانی تورکمانی وتی: زۆر سوپاتان دەکەین و لەش ساغ بن - چۆ‌غ چۆغ مەمنونەم و ساغۆڵەسن.

 

چیرۆکی سەرەکی: پەیامنێری ئاڤا میدیا، ژیوار عەبدولڕەحمان، هەروەک بەڵێنی دابوو بەو ماڵەی پێشتر سەردانی کردبوون، گەڕایەوە بۆلایان و ئەو هاوکارییانەی گەیاندە ماڵەکە کە خێرخوازان پاش بینینی ڕووماڵی ئاڤا میدیا بۆ ئەو ماڵە ئاوارە تورکمانەیان دەستەبەر کردبوو.

 

گۆشەیەكی دیكەی چیرۆکەکە: ماڵەکە لە نەتەوەی تورکمانن و چەند منداڵێکیان هەیە و لەبەر نەداریی و خراپی گوزەرانیان وازیان لە خوێندن هێنابوو، ڕۆژانە لە ناو کۆڵان و بازاڕەکان خەریکی کۆکردنەوەی پاشماوەی کارتۆن و پلاستیک بوون بۆ دابینکردنی بژێویی خێزانەکەیان.

 

چارەسەر: خێرخوازەکان بە ژیواریان ڕاگەیاندووە، نایانەوێت ناو و ڕووخساریان ئاشکرابێت، بەڵام کرێی ساڵێکی خانووی ئەو خێزانە دابین دەکەن، هەروەها مانگانە بڕێک هاوکاریی پێشکەشی ئەو خێزانە دەکەن و سەرجەم پێداویستییەکانی خوێندنی ئەو منداڵانە دابین دەکەن بۆئەوەی بگەڕێنەوە بۆ قوتابخانەکانیان.

 

باکگراوند: بەهۆی لافاوەکەی 9-12-2025 لە چەمچەماڵ، ئەم ماڵە زیانی زۆریان بەرکەوت و سەرجەم ڕاخەر، ئامێر، کەلوپەل و پێداوستییەکانی ژیانیان لەناوچوون، لەکاتێکدا دۆخی گوزەرانیان لە ئاستێکی زۆر خراپدا بووە و توانای ئەوەیان نەبوو لەم زستان و کاتە سەختەدا گرفتەکانی ژیانیان چارەسەر بکەن.