لە حەلەب درۆنێکی هێزەکانی دیمەشق چەند ئەندامێکی هەسەدە بە ئامانج دەگرێت

ئاڤا نیوز

 

هەسەدە دەڵێت، ئەمڕۆ هێزەکانی سەر بە حکومەتی کاتی سووریا لە شارۆچکەی دێر حافری باشووری ڕۆژهەڵاتی حەلەب لە باکووری سووریا، درۆنێکیان بەسەر چەند ئەندامێکیاندا تەقاندووەتەوە کە سەرقاڵی ئەرکێکی مرۆیی و هاوکاریی خەڵکی مەدەنی بوون، لە ئەنجامشدا دوو ئەندامیان بریندار بوون.

 

وێنە گەورەکە: سەرەڕای دووجار ئاگربەست لە ئاستی باڵا لەنێوان هەسەدە و دیمەشق، بەڵام بەشێوەی ڕۆژانە و لە سەرجەم ناوچەکان، گرژیی و پێکدادان لەنێوان هەسەدە و هێزەکانی سووریا ڕوودەدات. ئەوەش ئومێدەکانی بۆ چارەسەری درێژخایەنی کێشەکان لەنێوان هەردوو هێزەکەدا لاواز کردووە.

 

ڕاگەیێنراوی فەرمی: هێزەکانی سووریای دیموکرات هەسەدە لە ڕاگەیێنراوێکدا ئاماژەی بەوەشکردووە، لەکاتی هاوکاریکردنی بریندارانی هێرشێکی هێزەکانی سەر بە حکومەتی سووریا لە شارۆچکەی دێر حافر کە خەڵکی مەدەنی بوون، درۆنێکی هێزەکانی حکومەتی سووریا تەقیووەتەوە و هێزەکانیان و تیمە پزیشکییەکان و خەڵکی مەدەنییان کردە ئامانج، لە ئەنجامیشدا دوو ئەندامی هەسەدە برینداربوون.

 

ئەوەشی خستووەتەڕوو، ئەم هێرشە پێشهاتێکی مەترسیدارە و پێشێلکردنی سەرجەم یاسا نێودەوڵەتییەکانە، حکومەتی سووریاش بەرامبەر هەموو هێرشەکان و بە ئامانجگرتنی خەڵکی مەدەنی بە بەرپرسیار دەزانن، هەسەدەش مافی وەڵامدانەوەی ڕەوا لە بەرامبەر هێرشەکان بەکاردەهێنێت.