سەرچاوەیەکی حکومی: هەسەدە و دیمەشق ڕێککەوتوون و لە ڕۆژانی داهاتوو ڕایدەگەیێنن

ئاڤا نیوز

سەرچاوەیەکی حکومی لە سووریا ئاشکرای دەکات، هەسەدە و حکومەتی سووریا لەسەر پڕۆسەی یەکگرتنەوەی هێزەکانی هەسەدە لەگەڵ سوپای سووریا گەیشتوونەتە ڕێککەوتن و لە چەند ڕۆژی داهاتوودا بە فەرمی ئاشکرا دەکرێت. هەسەدەش دەڵێت، هێشتا هیچ پێشکەوتنێکی ڕاستەقینە بەدی نەهاتووە.

 

زانیاریی بەدەستهاتوو: سەرچاوەکە بە میدیاکانی سووریای ڕاگەیاندووە، هەر یەک لە هەسەدە و حکومەت ڕێککەوتوون ئەوەی ماوەتەوە ئەوەیە لە چەند ڕۆژی داهاتوودا میکانیزمی ڕێککەوتنەکە ڕابگەیێنرێت.

 

ئەوەی لەبارەیەوە دەگوترێت: هەسەدە ڕایگەیاند، سەرەڕای بەردەوامیی گفتوگۆ لەگەڵ حکومەتی سووریا، هێشتا هیچ پێشکەوتنێکی ڕاستەقینە لەسەر لێکتێگەیشتنی سیاسی و سەربازی نێوان هەردوولا بەدی نەهاتووە. هاوکات ئاماژەی بەوەشکردووە، پێشنیازێکی گشتگیریان پێشکەش کردووە کە هەنگاو و میکانیزمەکانی تێکەڵبوونیان بە سوپای سووریا و دامەزراوەکانی دەوڵەت خستۆتە ڕوو، بەڵام تا ئێستا حکومەتی دیمەشق وەڵامی ئەم پێشنیازەی نەداوەتەوە.

 

زانیاریی زیاتر: ڕۆژی 13ی ئەمساڵ، مەزڵووم عەبدی،  فەرماندەی هەسەدە لە یادی دەیەمین ساڵوەگەڕی دامەزراندنی ئەنجوومەنی سووریای دیموکرات (مەسەد) جەختی لەوە کردەوە "ڕێککەوتنی 10ی ئازار دەبێت بنەمایەک بێت بۆ بونیادنانی سووریایەکی نوێ و هەسەدە پابەندە بە جێبەجێکردنی لە باکوور و ڕۆژهەڵاتی سووریا."

 

باکگراوند: ڕۆژی 10ی ئازار، ئەحمەد شەرع، سەرۆکی سووریا و مەزڵووم عەبدی، ڕێککەوتنێکیان واژۆ کرد کە بەپێی ڕاگەیێنراوی سەرۆکایەتیی سووریا، هەموو دامەزراوە مەدەنی و سەربازییەکانی سەر بە ئیدارەی خۆبەڕێوەبەریی کوردی لە چوارچێوەی دەوڵەتی سووریا یەکدەخرێن.