هەزاران کتێب پێشکەش بە کتێبخانەی گشتیی چەمچەماڵ دەکرێت

ئاڤا نیوز

بەهۆی لافاوەکەی چەمچەماڵ زیانی زۆر بەر کتێبخانەی گشتیی چەمچەماڵ کەوتووە و چەند کەسێکی دیاریش لە هەرێمی کوردستان بڕیاریانداوە بە هەزاران کتێب دووبارە کتێبخانەکە نۆژەن بکەنەوە. 

چیرۆکی سەرەکی: جگە لە زیانە گیانی و ماددییەکان، بەهۆی لافاوەکەی چەند رۆژی ڕابردووی چەمچەماڵ، کتێبخانەی گشتیی ئەو قەزایەش زیانی زۆری بەرکەوتووە و بە هەزاران کتێب، گۆڤار و ڕۆژنامە لەناوچوون

لێدوانی فەرمی: دکتۆر محەممەد خوڕشید، بەرپرسی لقی 12ی پارتی دیموکراتی کوردستان لە هەڵەبجە، بە ئاڤای راگەیاند، دوای ئەوەی زەرەر و زیانەکانم زانی، وەکو وەفایەک ویستم هاوکاریی ئەو قەزایە بکەم، بۆیە بڕیاریشمدا 500  کتێب بە ناونیشانی جۆراوجۆر بە کتێبخانەی گشتیی چەمچەماڵ ببەخشم.

لەلایەکی دیکەوە: رێبین فەتاح، نووسەر و ڕۆژنامەنووس، خاوەنی ماڵی وەفایی، قسەی بۆ ئاڤا کرد وتی: "هەڵمەتێکمان بۆ ئاوەدانکردنەوەی کتێبخانەی گشتیی چەمچەماڵ دەستپێکردووە، تا ئيستا 1000 کتێبمان کۆکردووەتەوە و بەشدار دەبین لە ئاوەدانکردنەوەی ئەو کتێبخانەیە.

-زۆربەی دامودەزگاکان هاتوونەتە سەرهێڵ چاوەڕێ دەکەین، 5000 کتێب بگاتە دەستمان تاوەکو پێشکەشی چەمچەماڵییەکانی بکەین.

زانیاریی زیاتر: ئاوەدانکردنەوە و نۆژەنکردنەوەی کتێبخانەی گشتیی چەمچەماڵ چەند رۆژێکە دەستی پێکردووە،  سەیوان وادی، بەڕێوەبەری گشتیی کتێبخانەی شۆڕش و فەرمانبەر لە کتێبخانەی گشتیی چەمچەماڵ، لە گەشتیی هەواڵەکانی کەلتووری ئاڤا بەشداری کرد و  وتی: " لافاو زەرەر و زیانێکی زۆری لە کتێبخانەی گشتیی داوە، بەڵام خۆشبەختانە زۆربەی لایەنەکان هاتوونەتە سەرخەت بۆ ئەوەی هاوکاریمان بکەن، بەمزووانەش کتێبخانەکە دووبارە نۆژەن دەکەینەوە.