تیپی هونەریی میللیی دهۆک لە فێستیڤاڵێکی نێودەوڵەتی لە هیندستان بەشداربووان سەرسام دەکەن

ئاڤا نیوز 

 

تیپی هونەریی میللیی دهۆک لە فێستیڤاڵێکی نێودەوڵەتی لە هیندستان نوێنەرایەتی هەرێمی کوردستان دەکەن و بە نمایشەکانیان بەشداربووانی فێستیڤاڵەکە سەرسام دەکەن.

 

چیرۆکی سەرەکی: 39یەمین فێستیڤاڵی نێودەوڵەتی سوراجکوندی مێلا لە شاری فەریدئابادی ویلایەتی هاریانای هیندستان لە ڕۆژی شەممە 31-1-2026 دەستیپێکرد و تاوەکو ڕۆژی یەکشەممە 15-2-2026 بەردەوام دەبێت کە ژمارەیەکی زۆری تیپی هونەری و هونەرمەندان لەسەر ئاستی 44 وڵات بەشدارن.

 

لێدوانی فەرمی: ئەحمەد مشەختی، سەرۆکی تیپی میللیی دهۆک بە ئاڤا میدیای ڕاگەیاند، تیپی هونەریی میللیی دهۆک بە نوێنەرایەتیی عێراق و هەرێمی کوردستان بەشداریی فێستیڤاڵەکایان کرد، هەروەها چەند تابلۆیەکی هونەرییان نمایشکرد کە بوونە جێی سەرنجی جەماوەری بەشداربووی فێستیڤاڵەکە.

 

ئاماژە بەوە دەکات، لە فێستیڤاڵەکەدا تیپی هونەریی میللیی دهۆک لەسەر ستەیجی فێستیڤاڵەکە چەندین خەڵاتی پێدرا، هەروەها تیپی هونەریی میللیی دهۆک خەڵاتێکی تایبەتی پێشکەش بە تیپی هونەریی میللیی وڵاتی میسر کرد.

 

زانیاری زیاتر: سەرۆکی تیپی هونەریی میللی دهۆک باس لەوەش دەکات، ئەندامانی تیپەکە کە لە کوڕ و کچانی دهۆک پێکهاتوون، بە نەخشە و ئاڵای کوردستان بەشدارییان کرد. هاوکات بە ئامادەبوونی جێگری سەرۆکوەزیرانی هەرێمی هاریانا، لەسەر ئاستی 44 وڵات، تیپی دهۆک و چوار تیپی دیکە هەڵبژێردران کە نمایشەکانیان بکەن.

 

فێستیڤالەکە، ڕۆژانە دوو بەشی جیاواز لەخۆ دەگرت، بەشی یەکەم لەسەر ستەیج تیپەکان نمایشەکانیان دەکرد، بەشی دووەمیش ڕۆژانە نمایشەکان بەشێوەی ڕێپێوان بوو کە ژمارەیەکی زۆر خەڵک بەشدار دەبوون.

 

لەلایەکی دیکەوە: بە وتەی سەرۆکی تیپی دهۆک، لەبەرئەوەی تیپی دهۆک نوێنەرایەتی هەموو عێراق و هەرێمی کوردستان دەکات، بۆیە بە پێنج تابلۆ بەشداریی کردووە، یەکێک لە تابلۆکان یان نمایشەکان تایبەت بوو بە پێکەوەژیانی نەتەوەیی و ئاینی لە هەرێمی کوردستان. هاوکات، تابلۆیەکی دی بە ناوی شاهی، تایبەت بوو بە کەلتووریی دەڤەری بادینان. لەهەمان کاتدا تابلۆی سۆرانی کە نمایشی کەلتووریی هەولێر و سلێمانی دەکات، بەشداربوون، لەگەڵ دوو تابلۆی دیکە کە هەر یەکە و بەشێوەیەکی تایبەت نمایش دەکران.