لە کەرکووک ڕێگری دەکرێت ئاڵای دەستی پەیکەری پێشمەرگە بگۆڕن بۆ ئاڵای کوردستان

ئاڤا نیوز

لە کەرکووک کۆمەڵێک گەنجی کورد لەبەردەم پەیکەری پێشمەرگە گردبوونەوەتەوە و دەیانەوێت ئاڵای دەستی پەیکەرەکە بگۆڕن لە ئاڵای عێراقەوە بۆ ئاڵای کوردستان، هێزێکی زۆری ئەمنیش هەوڵی بڵاوەپێکردنیان دەدەن.

چیرۆكی سەرەكی: ژمارەیەك گەنجی كورد لە شاری كەركووك، لە ڕۆژی ئاڵای كوردستان، هەوڵیاندا ئاڵای كوردستان بخەنە دەستی پەیكەری پێشمەرگە لە دەروازەی شارەكە، بەڵام بۆ ڕێگریكردن لەو ویستەی گەنجانی شارەكە، زیاتر لە 300 سەربازی سوپای عێراق و دژەتیرۆر لە سەربازگەی كەی وەنەوە بەرەو دەوروبەری پەیكەری پێشمەرگە جووڵەیان پێكرا و ئێستا لەو ڕێگرییان لە گەنجە کوردەکان کرد.

زانیاریی پەیامنێر: پەیامنێری ئاڤا لە كەركووك لە نزیك پەیكەری پێشمەرگەیە و قسەی لەگەڵ ئەو گەنجانە كردووە و ئەوان دەڵێن، بەرپرسانی ئیداریی شارەكە بەهیچ شێوەیەك گوێ لە داواكارییەكانمان ناگرن.

باكگراوند: هەشت ساڵ لەمەوبەر و بەدیاریكراوی دوای ڕووداوەكانی 16ـی ئۆكتۆبەر و دۆخی بەزۆر سەپێنراوی شاری كەركووك، ئاڵای كوردستان لە دەستی پەیكەری پێشمەرگە لادرا و بەجێگەی ئەوە ئاڵای عێراق خراوەتە دەستی.