ئەنجوومەنی ئاسایش تۆمەتباری شکاندنی کێلی گۆڕستانی کریستییانەکانی شەقڵاوە دەستگیر دەکات

ئاڤا نیوز

دوای ئەوەی لە رۆژی 13ـی کانوونی یەکەمی 2025، کێلی چەند گۆڕێکی گۆڕستانی کریستییانەکان لە شەقڵاوە شکێندران و شێوێنران، دامەزراوەکان لە ئەنجوومەنی ئاسایشی هەرێمی کوردستان دەستبەجێ دەستیان بە لێکۆڵینەوە کرد و تۆمەتباری سەرەکییان دەستگیرکرد.

چیرۆکی سەرەکی: ئەنجوومەنی ئاسایشی هەرێمی کوردستان ناسنامەی ئەنجامدەری شکاندن و شێواندنی کێلی چەند گۆڕێکی گۆڕستانی کرسیتییانەکانی شەقڵاوە بەناوی حوسێن ساڵح مستەفا ئاشکرا دەکەن، ناوبراو دانیشتووی خەڵکی هەولێرە و پێشینەی تاوانی هەیە، پێشووتریش دەستگیرکراوە.

لێدوانی تۆمەتبار: تۆمەتبار حوسێن ساڵح مستەفا، لە دانپێدانانەکەیدا دەڵێت: ساڵی 2022 لە بازاری هەولێر مەرقەدێکم سووتاند لەلایەن ئاسایشی هەولێر دەستگیرکرام". دەشڵێت: 13ـی ئەم مانگە چوومە شەقڵاوە، دواتر چوومە گۆڕستانی کریستییانەکان بە بەرد کێلەکانم شکاند، لە ژێر کاریگەریی ماددە کحوولییەکان ئەو کارەم ئەنجامدا".

ڕاگەیێنراوی فەرمی: ئەنجوومەنی ئاسایشی هەرێمی کوردستان ڕایگەیاند، تۆمەتباری سەرەکی "حوسێن ساڵح مستەفا"، لەسەر فەرمانی دادوەری لێکۆڵینەوە دەستگیرکراوە، تۆمەتبار دانی بە تاوانەکەی ناوە لە ژێر کاریگەریی ماددە کحولییەکان ئەو کارەی ئەنجامداوە.