چیرۆكی ئەو ماڵەی چەمچەماڵ كە لەلایەن سەرۆكوەزیرانەوە بەڵێنی کڕینی خانوویان پێ درا

ئاڤا نیوز

دوای ئەوەی چەند کەسێک لە چەمچەماڵ ڤیدیۆی ماڵێکی هەژاریان بۆئاڤا نارد، ژن ومێردێکی بەتەمەن لە نزاکانییان داوا دەکەن ئاڤا بەسەریان بکاتەوە، ئەمڕۆ پەیامنێری ئاڤا چووە ئەو ماڵە و بەڵێنیان پێدرا خانوویەکی نوێیان بۆ بكڕدرێت.

چیرۆکی سەرەکی: لە چەمچەماڵ خێزانێکی هەژار لە خانوویەکی کۆندا دەژیان میراتی شەش برا و خوشکێکە، لەماوەی ڕابردوو لافاوەکەی چەمچەماڵ ماڵەکەیانی گرتەوە و ژیانییانی ئەوەندەی دیکە سەختتر کرد، سەرۆکوەزیران مەسرور بارزانی، دوای ئەوەی لە ئاڤا بارودۆخی ژیانی ئەو خێزانەی بینی، بڕیاری دا خانوویەکیان بۆ دروستبکات بە پێداویستییەکانی ناوماڵیشەوە.

لێدوانی فەرمی: ژیوار عەبدولڕەحمان، پەیامنێری ئاڤا بەشێوەی ڕاستەوخۆ لە گەشتی هەواڵەکانی سەعات حەوتدا چووە ئەو ماڵە، ژن و مێردەکە قسەیان بۆ ئاڤا کرد و گوتیان، هەر دوعامان دەکرد ئاڤا بێتە ماڵمان دوعاکەمان گیرابوو، ئەوەی ئاڤا بۆ ئێمەی کرد کەس نەیکردووە، بورهان خاوەنی ماڵەکە باسی چیرۆکی ساتی هاتنی لافاوەکەی کرد و گوتی، لافاو لە چەند خولەکێک ماڵەکەمانی وێرانکرد و منداڵەکانمان دەڵێن چیتر ناتوانین لەو خانووەدا بژین و دەچنە ماڵی نەنکیان دەخەون.

دوای ئەوەی هەواڵی کڕینی خانوو و دابینکردنی پێداویستییەکانی ناوماڵیان پێدرا لەلایەن نووسینگەی سەرۆکوەزیران مەسرور بارزانییەوە ئەو خێزانە کوڕنوشی سوپاسگوزارییان برد.