بەهۆی لافاو مین و تەقەمەنی بینرا و هۆشداری دەدرێت

ئاڤا نیوز

 

دەزگای گشتیی کاروباری مین لە هەرێمی کوردستان هۆشداری بە هاووڵاتیان دەدات لە مەترسی ڕاماڵینی مین و تەقەمەنی و پاشماوەی جەنگ و دەرکەوتنیان بەهۆی بارانبارین و لافاو.

 

وێنە گەورەکە: بەهۆی بارانبارین و لافاو، ژمارەیەک مین و تەقەمەنی و پاشماوەی جەنگ دەرکەوتوون، دەزگای مین هۆشداری بە هاووڵاتیان دەدات، داوا دەکات لەهەر شوێنێک مین یان تەقەمەنییان بەرچاو کەوت لێی دوور بکەنەوە و "پەیوەندیمان پێوە بکەن".

 

لێدوانی فەرمی: عەلی میرانی، بەڕێوەبەری گشتیی تەکنیکی لە دەزگای مین، بە ئاڤا میدیای ڕاگەیاند: هاووڵاتیان ئاگادار دەکەینەوە بەهۆی بارانبارین و لافاو، مەترسیی ڕاماڵینی مین و تەقەمەنی و پاشماوەكانی دیكەی جەنگ هەیە، بۆیە هەر کەسێک ئەو مین و پاشماوە جەنگییانەی بینی پەیوەندی بە ژمارە 182 بکات بۆ ئەوەی تیمەکانمان بگەنە شوێنەکە و مینەکە هەڵبگرنەوە.

 

لەکاتی بارانبارینەکەی ئەم دواییە و دروستبوونی لافاو چەند مینێک لە سنووری هەڵەبجە دەرکەوتن، تیمەکانمان گەیشتنە شوێنەکە و هەڵیانگرتەوە، هاوکات لە چەند ڕۆژی ڕابردوو لەلایەن یاریدەدەرێتیی ئاسایشی بەردەقارەمان ئاگادار كراینەوە لە بوونی گوللـە هاوەن و ئار بی جی، كە بەهۆی لافاو و ڕاماڵینی زەوییەوە دەركەوتبوون، تیمی تایبەت سەردانی شوێنەكەیان كرد و پاشماوە جەنگییەكانیان گواستەوە بۆ شوێنێكی پارێزراو، بەمەبەستی لەناوبردنیان لە داهاتوودا.

 

ئەمەش بزانە: ڕۆژی چوارشەممە هاونیشتمانیان لە سنووری ناحیەی سیروانی سەر بە هەڵەبجە تیمەکانی مینیان ئاگادار کردەوە کە مینێک لە جۆری VS-50 لە کەناری دەریاچەی دەربەندیخان بینرا، تیمەکانی کاروباری مین لە هەڵەبجە، سەردانی شوێنەکەیان کرد و مینەکەیان پووچەڵ کردەوە و گواستیانەوە بۆ شوێنی تایبەت تاوەکوو لە داهاتوودا لەناوببرێت.