بارەگای بارزانی: سوپاسی هەموو ئەو کەسانە دەکەین کە یارمەتییان گەیاندووەتە لێقەوماوان

ئاڤا نیوز

بارەگای بارزانی سوپاسی هەموو ئەو كەس و لایەنانە دەكات كە هاوكارییان گەیاندووەتە لێقەوماوان و زیانبارانی لافاوەكەی چەمچەماڵ و بە نموونەیەكی بەرزی هاوسۆزی و هاودەنگیی نەتەوەیی و نیشتمانیی نێوان كوردستانیان وەسفی دەكات.

چیرۆكی سەرەكی: دوای بارینی ڕێژەیەكی زۆری باران و ڕوودانی لافاو لە سنووری چەمچەماڵ، تەكیە و شۆڕش، دانیشتووانی ئەو ناوچانە زیانێكی زۆریان بەركەوت، ڕێكخراوەكان و هاووڵاتیان و خەڵكی كوردستان بەگشتی لە ناوچە جیا جیاكانی كوردستانەوە، بەشێوەیەكی بەرفراوان بەدەنگ لێقەوماو و زیانلێكەوتووانی ڕووداوەكەوە هاتن.

بڵاوكراوەی فەرمی: بارەگای بارزانی لە ڕاگەیێنراوێكدا سوپاسی هەموو ئەوانە دەكات كە یارمەتییان گەیاندووەتە لێقەوماو و زیانبەركەوتووانی لافاوەكە.

بارەگای بارزانی ئاماژەی بەوەشكردووە، ئەو بەدەنگەوەهاتنە نموونەیەكی بەرزی هاوسۆزی و هاودەنگیی نەتەوەیی و نیشتمانیی نێوان خەڵكی كوردستان و جێگەی پێزانینێكی زۆرە، هاوكات هیوای ئارامی و سەلامەتی بۆ هاووڵاتیانی خۆشەویستی كوردستان دەخوازێت.

پەیوەست بەم بابەتە: ئاڤا میدیا لەڕێگەی ڕاگەیاندنی هەڵمەتی هاوكاریكردنی زیانلێكەوتووانی لافاوەكەی چەمچەماڵ، بڕێكی زۆری كۆمەك و هاوكاری لە كەرەستە و پارەی كاش كۆكردەوە و بە دەیان بارهەڵگری پڕ لە كەرەستە و پێداویستی، بەدەنگ لێقەوماوانەوە چوو، هاوكات ڕووماڵێكی فراوانی كرد و بەدرێژایی چەندین ڕۆژ لەنێوجەرگەی ئازار و ژانی لێقەوماو و زیانبەركەوتووانی لافاوەكە بوو.