ڕوفاتی 11 کەس لە گۆڕێکی بەکۆمەڵدا لە دیمەشق دۆزرایەوە

ئاڤا نیوز

تیمەکانی بەرگریی شارستانی لە دیمەشق، گۆڕێکی بەکۆمەڵیان لە گەڕەکی تەزامون دۆزییەوە کە ڕوفاتی 11 کەسی تێدایە.

چیرۆکی سەرەکی: ئەمڕۆ پێنجشەممە 5-2-2026، لە نزیک کەمپی یەرمووک لە گەڕەکی "تەزامون"ـی دیمەشقی پایتەختی سووریا، گۆڕێکی بەکۆمەڵ دۆزرایەوە. تیمەکانی بەرگریی شارستانی 11 تەرمیان لە نێو گۆڕەکەدا دەرهێناوە کە دەکەوێتە نزیک شەقامی "دعبول" و تەنیا 50 مەتر لەو شوێنەوە دوورە کە تێیدا کۆمەڵکوژییە بەناوبانگەکەی ساڵی 2013ـی لێ ئەنجامدرا.

لێدوانی فەرمی: میدیای فەرمیی حکومەتی سووریا بڵاویکردەوە: تیمەکانی بەرگریی شارستانی لە گەڕەکی تەزامون نزیک شەقامی دعبول، توانیویانە تەرمی 11 کەس لە گۆڕێکی بەکۆمەڵدا دەربهێنن و ڕەوانەی پزیشکی دادوەرییان بکەن.

زانیاریی زیاتر: شوێنی ئەم گۆڕە نوێیە تەنیا 50 مەتر دوورە لەو شوێنەی کە تێیدا لە نیسانی 2013ـدا کۆمەڵکوژیی گەڕەکی تەزامونی تێدا ئەنجامدرا. ئەو تاوانەی هێزەکانی بەشار ئەسەد تا ساڵی 2022 بە نهێنی مابووەوە، تا ئەو کاتەی گرتە ڤیدیۆیەک بڵاوبووەوە کە تێیدا دەرکەوت 41 هاووڵاتیی مەدەنی دوای ئەوەی لەسێدارە دەدرێن، فڕێ دەدرێنە ناو چاڵێکەوە و تەرمەکانیان دەسووتێنرێن.

ئەوەی پێویستە بیزانیت: ئەمە 5ـەمین گۆڕی بەکۆمەڵە کە لە دوای ڕووخانی ڕژێمی ئەسەدەوە لەو ناوچەیە دۆزراوەتەوە و تێیاندا ئێسک و پروسکی زیاتر لە 50 کەس دەرهێنراوە.