ساڵی ڕابردوو زیاتر لە 15 هەزار هاوبەشی کارەبا لە سلێمانی زیاد بووە

ئاڤا نیوز

ساڵی ڕابردوو زیاتر لە 15 هەزار هاوبەشی کارەبا لە سلێمانی زیاد بووە و ژمارەی هاوبەشانی کارەبا لە سنوورەکە 555 هەزار هاوبەشی تێپەڕاند.

وێنە گەورەکە: پڕۆژەی ڕووناکی بۆ دابینکردنی کارەبای 24 کاتژمێری، ڕۆژ لە دوای ڕۆژ لە فراوانبووندایە؛ ئێستا لە سەنتەری شارەکانی هەولێر، سلێمانی، دهۆک و ئیدارە سەربەخۆکان و چەندین ناوچەی دیکە کارەبای 24 کاتژمێری هەیە. پلانی حکومەتی هەرێمی کوردستان وایە تا کۆتایی ئەمساڵ کارەبای 24 کاتژمێری بگاتە سەرجەم ناوچەکان.

لێدوانی فەرمی: سیروان محەممەد، وتەبێژی کارەبای سلێمانی بە ئاڤای ڕاگەیاند، لە سنووری بەڕێوەبەرایەتیی گشتیی كارەبای سلێمانی، ساڵی ڕابردوو زیاتر لە 15 هەزار هاوبەشی نوێ تۆمار کراون و ئەو ژمارەیە بۆ تۆڕی کارەبا زیاد بووە.

زانیاریی زیاتر: بە گوتەی سیروان محەممەد، لەو ڕێژه‌یه‌ 10 هەزار و 684ـیان هاوبەشی ماڵان بوون کە كارەبایان وەرگرتووە و تۆمار کراون.

باکگراوند: كۆتایی ساڵی 2024 كۆی هاوبەشانی كارەبای سنووری بەڕێوەبەرایەتیی گشتیی كاره‌بای سلێمانی 540 هەزار و 385 هاوبەش بووە، لە كۆتایی ساڵی 2025 زیادی کردووە بۆ 555 هەزار و 520 هاوبەشی کارەبا، بەوەش ساڵی ڕابردوو 15 هەزار و 135 هاوبەشی نوێ تۆمار کراون.