وەزیری دەرەوەی فەرەنسا لەگەڵ سەرۆک بارزانی و مەزڵووم عەبدی کۆدەبێتەوە

ئاڤا نیوز

جان نۆێڵ بارۆ، وەزیری دەرەوەی فەرەنسا بۆ تاوتوێکردنی ئایندەی ڕۆژئاوای کوردستان و جێبەجێکردنی ڕێککەوتنە ئەمنییەکان سەردانی هەولێر دەکات و لەگەڵ سەرۆک بارزانی و مەزڵووم عەبدی کۆدەبێتەوە.

چیرۆکی سەرەکی: ئەمڕۆ پێنجشەممە 5-2-2026، مەزڵووم عەبدی، فەرماندەی گشتیی هەسەدە گەیشتە هەولێر و کاتژمێر 8:00ـی ئەمشەویش جان نۆێڵ بارۆ، وەزیری دەرەوەی فەرەنسا دەگاتە شارەکە و لەلایەن نێچیرڤان بارزانی، سەرۆکی هەرێمی کوردستان پێشوازی لێ دەکرێت.

٠ بڕیارە سبەی هەینی، وەزیری دەرەوە لەگەڵ سەرۆک مەسعود بارزانی و مەزڵووم عەبدی کۆببێتەوە بۆ تاوتوێکردنی ئایندەی ڕۆژئاوای کوردستان و جێبەجێکردنی ڕێککەوتنامەی نێوان عەبدی و ئەحمەد شەرع، کە ئیمانوێل ماکرۆن بەڵێنی داوە ببێتە گەرەنتیکاری.

زانیاریی زیاتر: وەزیری دەرەوەی فەرەنسا پێش گەیشتنی بۆ هەولێر، بەیانیی ئەمڕۆ لە دیمەشق لەگەڵ ئەسعەد شەیبانی، وەزیری دەرەوەی سووریا کۆبووەوە و دوانیوەڕۆش لە بەغدا لەگەڵ فوئاد حوسێن و محەممەد شیاع سوودانی دیداری ئەنجام دا. لە بەغدا جەخت لەسەر کڕینی سیستەمی ڕاداری پێشکەوتوو لە کۆمپانیایەکی فەرەنسی کرایەوە بۆ کۆنترۆڵکردنی ئاسمانی عێراق.

لێدوانە فەرمییەکان: د. فوئاد حوسێن، وەزیری دەرەوەی عێراق ڕایگەیاند: بۆ کڕینی ڕاداری سەربازیی پێشکەوتوو، گرێبەستمان لەگەڵ کۆمپانیایەکی فەرەنسی کردووە بە ئامانجی پاراستنی ئاسمانی عێراق و بەهێزکردنی سەروەریی وڵات.

جان نۆێڵ بارۆ، وەزیری دەرەوەی فەرەنسا لە کۆنفرانسە ڕۆژنامەوانییەکە گوتی: بەردەوام دەبین لە پشتیوانیکردنی عێراق، هەرێمی کوردستان و ڕۆژئاوای کوردستان، بەتایبەت لە ڕووبەڕووبوونەوەی مەترسییەکانی داعشدا.