وەزارەتی کار و کاروباری کۆمەڵایەتی بڕیارێک بۆ هاووڵاتیانی خاوەن پێداویستی تایبەت دەردەکات

ئاڤا نیوز

وەزارەتی کار و کاروباری کۆمەڵایەتی، ڕێنمایی مۆڵەتی "خۆتەرخانکار" هەموار دەکاتەوە، بەپێی گۆڕانکارییە نوێیەکان، چەندین نەخۆشیی دیکە دەخرێنە ناو لیستی مۆڵەتەکەوە و ئاسانکاری بۆ فەرمانبەرانی بەخێوکەر دەکرێت.

چیرۆکی سەرەکی: وەزارەتی کار و کاروباری کۆمەڵایەتی، بە ڕێنمایی ژمارە 1ـی ساڵی 2026، ڕێکاری پێدانی مۆڵەتی بەخێوکاری (خۆتەرخانکار) بۆ ئەو فەرمانبەرانە هەموار کردەوە کە کەسێکی پلە یەکی خێزانەکەیان خاوەن پێداویستیی تایبەتە و پێویستی بە چاودێریی بەردەوام هەیە.

لێدوانی فەرمی: هیوا ڕەحمان، بەرپرسی بەشی یاسا لە بەڕێوەبەرایەتیی گشتی، ڕایگەیاند: "هەموارەکە ژمارەیەک گرفتی گەورەی چارەسەر کردووە، گرنگترینیان لەوانە، زیادکردنی جۆرەکانی خاوەن پێداویستە تایبەتەکان وەکو نەخۆشییەکانی (دەردەفیل، شەکرەی جۆری یەکەم بۆ منداڵانی خوار 15 ساڵ، تالاسیمیا و هیمۆفیلیا) دەتوانن سوودمەند بن لە مۆڵەتی بەخێوکار."

هیوا ڕەحمان، دەشڵێت: "ئاسانکاری بۆ دایک و باوک دەکرێت، ئەگەر لە خێزانێکدا زیاتر لە تووشبوویەکی ئۆتیزم یان شەلەل دەماغیان هەبێت، دایک و باوک هەردووکیان فەرمانبەر بن، دەتوانن پێکەوە مۆڵەتەکە وەربگرن، هاوکات دەتوانن بە ڕێککەوتنی نێوان خۆیان مۆڵەتەکە بۆ چاودێریی منداڵەکانیان بەکاربهێنن."

٠ ئەو کەیسانەی چارەسەریان نییە وەک (داون، لەدەستدانی ئەندامێکی جەستە، هیمۆفیلیا و تالاسیمیا) تەنیا یەک جار دەچنە بەردەم لیژنەی پزیشکی و پێویست بە دووبارەکردنەوە ناکات.

• فەرمانبەری داواکار دوو ساڵ جارێک مامەڵەی نوێکردنەوەی مۆڵەتەکەی ئەنجام دەدات.

زانیاریی زیاتر: لە ڕێنماییەکاندا جەخت کراوەتەوە کە فەرمانبەری داواکار ناتوانێت لە یەک کاتدا بۆ دوو کەسی خاوەن پێداویستی تایبەت، لە خێزانەکەیدا مۆڵەت وەربگرێت، تەنها لەو حاڵەتە تایبەتانەی کە لە هەموارەکەدا ئاماژەیان پێ دراوە.