هاوپەیمانیی نەسر بۆ ئاڤا: نزیکبوونەوە لە یەکلاییکردنەوەی پرسی سەرۆکوەزیران

ئاڤا نیوز

هاوپەیمانیی نەسر، بە سەرۆکایەتی حەیدەر عەبادی دووپاتی دەکاتەوە، پێشکەوتنێکی بەرچاو لەنێو چوارچێوەی هەماهەنگیدا هەیە بۆ یەکلاییکردنەوەی پرسی سەرۆکوەزیرانی داهاتوو، ئەوان چاوەڕوانیی یەکلاییکردنەوەی پۆستی سەرۆکی پەرلەمانن لەلایەن لایەنە سوننەکانەوە.

وێنە گەورەکە: پرۆسەی پێکهێنانی حکومەتی نوێی عێراق بە قۆناغێکی چارەنووسسازدا تێپەڕ دەبێت، کە تێیدا یەکدەنگیی چوارچێوەی هەماهەنگی و ڕێککەوتن لەگەڵ پێکهاتەکانی دیکە، کلیلن بۆ هەڵبژاردنی سەرۆکوەزیرانێکی بەهێز کە بتوانێت ڕووبەڕووی قەیرانە ناوخۆیی و دەرەکییەکان ببێتەوە و سەقامگیریی سیاسی مسۆگەر بکات.

لێدوانی فەرمی: سەلام زوبەیدی، گوتەبێژی هاوپەیمانیی نەسر، بە ئاڤا میدیای ڕاگەیاند، "پێشکەوتنێکی ڕوون و گەورە لەنێو چوارچێوەی هەماهەنگیدا هەیە بۆ یەکلاییکردنەوەی هەڵبژاردنی سەرۆکوەزیرانی داهاتوو و یەکلاییکردنەوەی کۆتایی ناوەکە لە چەند ڕۆژی داهاتوودا دەبێت."

ئەوەی ئێستا ڕوودەدات: زوبەیدی ڕوونیکردەوە، چوارچێوەی هەماهەنگی چاوەڕێی یەکلاییکردنەوەی سەرۆکی پەرلەمانە لەلایەن لایەنە سوننەکانەوە، چونکە "پۆستی سەرۆکوەزیرانیش پەیوەستە بە ڕێککەوتن لەگەڵ هاوبەشە سیاسییەکان لە دەرەوەی چوارچێوەکە."

لەلایەکی دیکەوە: عەباس مووسەوی، ڕاوێژکاری هاوپەیمانیی دەوڵەتی یاسا، بۆ ئاڤا میدیا دووپاتی کردەوە "هەڵبژاردنی سەرۆکوەزیران پەک نەکەوتووە، بەڵکو چاوەڕێی هەڵبژاردنی سەرۆکی پەرلەمان و سەرۆککۆمارین." مووسەوی جەختی لەوە کردەوە کە "گرنگترین شت پاراستنی یەکڕیزیی چوارچێوەی هەماهەنگییە تەنانەت دوای ڕاسپاردنی سەرۆکوەزیرانیش."