دەوڵەت باخچەلی ئەنجامدانی گردبوونەوە و ڕێپێوان بۆ ئازادکردنی ئۆجەلان بە ئاسایی دەزانێت

ئاڤا نیوز

بۆ یەکەمجار سەرۆکی گشتیی مەهەپە ئەنجامدانی گردبوونەوە و ڕێپێوان بە مەبەستی داواکاری بۆ ئازادکردنی عەبدوڵڵا ئۆجەلان بە ئاسایی دەزانێت و دەڵێت: بەڵام ئۆجەلان خودی خۆی داوای ئازادبوونی نەکردووە.

چیرۆکی سەرەکی: لە کاتێکدا پرۆسەی ئاشتیی هەنگاوی باشی بڕیووە و پێ دەنێتە ناو قۆناغێکی نوێ، دەم پارتی لە 4-1-2026ەوە چالاکییەکی بەرفراوان لە ئامەد ئەنجام دەدات بۆ ئەوەی ئۆجەلان ئازاد بکرێت.   

لێدوانی فەرمی: دەوڵەت باخچەلی، سەرۆکی گشتیی مەهەپە لەمبارەیەوە دەڵێت: بە ڕەچاوکردنی دەستوور و یاسا کارپێکراوەکان، هەموو حزبێک مافی خۆیەتی چالاکی جۆراوجۆر ئەنجام بدات داواکارییەکانی خۆی بخاتە ڕوو و ئەمەش بە سروشتیبوونی دیموکراسی ناو دەبات. 

باخچەلی ئاماژە بەوەش دەدات لەو ماوەیەدا تاوەکو ئێستا جەهەپە 75 چالاکی لەم جۆرەی ئەنجام داوە و پارتەکانی دیکەیش بە هەمان شێوە، بەڵام لەبەرچی بۆ دەم پارتی ئەمە بە ڕەوا نازانرێت، قابیلە چی تێدایە؟

ئەوەی پێویستە بزانیت: هاوکات باخچەلی جەخت لەوە دەکاتەوە لەو پەیامەی ئۆجەلان لە 27ی شوبات بڵاوی کردەوە بە هیچ جۆرێک داوای ئەوەی نەکردووە ئازاد بکرێت و لە زیندان بێتە دەرەوە و نابێت ئەوە لەبیر بکرێت. 

لەلایەکی دیکەوە: ئەم قۆناغەی پرۆسەی ئاشتی بە پێچەوانەی قۆناغەکانی دیکە، بە دەستپێشخەری باخچەلی دەستی پێ کرد. ئەمەش لە کاتێکدایە پێشتر بەردەوام دژی چارەسەرکردنی پرسی کورد دەوەستایەوە بە ڕێگاچارەی ئاشتییانە.