مەسرور بارزانی: ئیزدییەکان دڵنیا دەکەینەوە لەوەی بەردەوام دەبین لە پشتیوانیی ماف و داخوازییەکانیان

ئاڤا نیوز

مەسرور بارزانی، سەرۆکوەزیرانی هەرێمی کوردستان پەیامێک ئاراستەی ئێزدییەکان دەکات و ڕایدەگەیێنێت، "برایانی ئێزدی دڵنیا دەکەینەوە ئێمە وەک هەمیشە بەردەوام دەبین لە پشتیوانیی ماف و داخوازییەکانیان".

چیرۆکی سەرەکی: ڕۆژووی ئێزدی یەكێكە لە بۆنە ئایینییەكانی كوردانی ئێزدی كە هاوكاتە لەگەڵ ناوەڕاستی مانگی كانوونی یەكەمی هەموو ساڵێک، تێیدا لە كورتترین ڕۆژانی ساڵدا ئێزدییەكان سێ ڕۆژ لەسەریەك بەڕۆژوو دەبن، خۆیان لە هەموو جۆرە مامەڵەیەكی دونیایی و وتنی قسەی نەشیاو بەدووردەگرن، هەروەها ئاژەڵ سەردەبڕن و گۆشتەكەی دابەش دەكەن.

پەیامی فەرمی: لە پەیامەکەی مەسرور بارزانی، سەرۆکوەزیرانی هەرێمی کوردستاندا هاتووە، بە هەڵکەوتی جەژنی ڕۆژووی ئێزدی، گەرمترین پیرۆزبایی ئاراستەی خوشک و برایانی ئێزدی لە کوردستان و جیهان دەکەم.

- هیوادارم بە خێر و خۆشی ڕۆژەکانی جەژنەکە تێپەڕێنن. خوشک و برایانی ئێزدی دڵنیا دەکەینەوە وەک هەمیشە بەردەوام دەبین لە پشتیوانیی ماف و داخوازییەکانیان و بەهێزکردنی کولتووری پێکەوەژیان لە هەرێمی کوردستان. جەژنی ڕۆژووی ئێزی پیرۆز بێت و هەر لە خێر و خۆشیدا بن.