هێرش دەکرێتە سەر سکرتێری ڕۆژنامەوانیی وەزیری پێشمەرگە و دەڕفێنرێت

ئاڤا نیوز

شەوی ڕابردوو لە نزیک بارەگای مەکتەبی سیاسیی یەکێتی لە هەولێر، هێرش کرایە سەر سکرتێری ڕۆژنامەوانیی وەزیری پێشمەرگە و ڕفێنرا.

چیرۆکی سەرەکی: شەوی ڕابردوو لە نزیک بارەگای مەکتەبی سیاسیی یەکێتی لە هەولێر، هێرش کرایە سەر میران بەکر، سکرتێری ڕۆژنامەوانیی وەزیری پێشمەرگە و ڕفێنرا. بە گوتەی خۆی، هێزێکی ئەمنیی سەر بە مەکتەبی سیاسیی یەکێتی بوون، تورەکەیان کردووەتە سەری و کەلەپچەیان کردووە؛ دوای سێ کاتژمێر پێیان گوتووە "هەڵەتێگەیشتن" بووە و ئازادیان کردووە.

لێدوانی فەرمی: میران بەکر، سکرتێری ڕۆژنامەوانیی وەزیری پێشمەرگە بە ئاڤا میدیای ڕاگەیاند: "کاتژمێر 11ـی شەوی ڕابردوو، لە گەڕەکی شەهیدانی یەکێتی لە نزیک بارەگای مەکتەبی سیاسیی یەکێتیی نیشتمانیی کوردستان لە هەولێر، هێزێکی ئەمنیی سەر بە مەکتەبی سیاسی، بە پلانێکی داڕێژراو هێرشیان کردە سەرم و منیان ڕفاند. تورەکەیان کردە سەرم و کەلەپچەیان کردم، بە شەق و بۆکس و پشتی چەک لێیان دام، بەبەردەوامیش سەریان خستبوومە ژێر کوشنی ئۆتۆمبێلەکە و ڕێگەیان نەدەدا تەنانەت یەک وشەش بڵێم".

زانیاریی زیاتر: دوای تێپەڕبوونی سێ کاتژمێر لە گرتن و ئەشکەنجەدان، پێیان گوتووە هەڵەتێگەیشتن بووە و ئازادیان کردووە.

میران بەکر دەڵێت: "تورەکەکردنە سەر و کەلەپچەکردن پێشهاتێکی نوێ و مەترسیدارە، چونکە تورەکە (کیسە) تەنیا دەکرێتە سەری تیرۆریستان". بە گوتەی خۆی، هێزەکە و ئەوانەی لەپشت کردەوەکەوە بوون ناسراون، بۆیە سکاڵای یاساییان لەسەر تۆمار دەکات.

ئەمەش بزانە: دوای ئازادکردنی، میران بەکر لە نەخۆشخانەیەکی تایبەت خەوێنراوە و چارەسەری پێویستی بۆ دەکرێت. بەپێی ڕاپۆرتی پزیشکی، پەردەی گوێی تەقیوە و لووتی شکاوە، ئازارێکی زۆری پێگەیشتووە و بەشێکی ڕووخساریشی هەڵاوساوە.