وەزیری بەرگریی تورکیا: بۆ هێرشکردنە سەر هەسەدە پرس بە کەس ناکەین

ئاڤا نیوز

یەشار گولەر، وەزیری بەرگریی تورکیا هەڕەشەی ئەنجامدانی ئۆپەراسیۆنی سەربازیی نوێ لە باکووری سووریا دەکات و دەڵێت: "چی پێویست بێت دەیکەین".

چیرۆکی سەرەکی: یەشار گولەر ڕایگەیاند، پێشتر کە هێزەکانی ئەمەریکا و ڕووسیا لە ناوچەکە بوون، ئەوان ئۆپەراسیۆنیان ئەنجام داوە و پرسیشیان بە کەس نەکردووە، لەمەودواش بۆ پاراستنی ئاسایشی وڵاتەکەیان چاوەڕێی ڕەزامەندیی هیچ لایەنێک ناکەن.

بۆچی گرنگە: ناکۆکی لەسەر شێوازی تێکەڵبوونی هەسەدە بە سوپای سووریا هەیە؛ تورکیا تەنیا ڕازییە چەکدارەکان بە "تاکەکەس" بچنە ناو سوپا، بەڵام هەسەدە دەیەوێت وەک "هێزێکی یەکگرتوو" بمێنێتەوە و تێکەڵ بێت، ئەمەش لای ئەنقەرە وەک مەترسی دەبینرێت.

لێدوانی فەرمی:  وەزیری بەرگریی تورکیا ئاماژەی بەوەش کرد، گفتوگۆکانیان لەگەڵ ئەمەریکا لەبارەی داهاتووی هەسەدە بەردەوامن و ئەنقەرە سوورە لەسەر ئەوەی ڕێگە بە هیچ قەوارەیەک نەدات لەسەر سنوورەکانی دروست بێت.

- لەبارەی ئەو فڕۆکە بێفڕۆکەوانەی لە 15ـی ئەم مانگەدا لە ئاسمانی ئەنقەرە خرایە خوارەوە، گولەر گوتی: "هێشتا بۆمان دەرنەکەوتووە درۆنەکە هی کام وڵات بووە، چونکە بەهۆی خستنەخوارەوەی بە تەواوی تێکشکا و ناسینەوەی قورسە".