سعوودیە مەرجەکانی بۆ ئاساییکردنەوەی پەیوەندییەکان لەگەڵ ئیسرائیل دووپات دەکاتەوە

ئاڤا نیوز

لەبارەی دۆسیەی ئاساییکردنەوەی پەیوەندییەکانی نێوان سعوودیە و ئیسرائیل، بەرپرسی پێشووی هەواڵگریی سعوودیە ڕایدەگەیەنێت، تاوەکو ئیسرائیل وەک "دەوڵەتێکی ئاسایی" ڕەفتار نەکات، گفتوگۆ لەسەر ئەو پرسە ناکرێت.

وێنە گەورەکە: ئاساییکردنەوەی پەیوەندییەکانی ئیسرائیل لەگەڵ وڵاتانی ناوچەکە، بەتایبەتی سعوودیە، یەکێکە لە ئامانجە سەرەکییەکانی ئەمریکا. ئیدارەی دۆناڵد ترەمپ هیوادارە لە ئایندەیەکی نزیکدا ڕیاز پەیوەندی بە "ڕێککەوتنەکانی ئیبراهیم"ـەوە بکات.

لێدوانی فەرمی: تورکی بن فەیسەڵ، بەرپرسی پێشووی هەواڵگریی سعوودیە، بە ڕۆژنامەی "تایمز ئۆف ئیسرائیل"ـی ڕاگەیاندووە: "سعوودیە بیر لە ئاساییکردنەوەی پەیوەندییەکان ناکاتەوە تاوەکو ئەو کاتەی ئیسرائیل وەک وڵاتێکی ئاسایی مامەڵە نەکات." دەشڵێت، بەدەستهێنانی متمانە پێویستی بەوەیە ئیسرائیل بەپێی ڕێسا نێودەوڵەتییەکان و بڕیارنامەکانی ئەنجوومەنی ئاسایش هەڵسوکەوت بکات.

زانیاریی بەدەستهاتوو: محەممەد بن سەلمان، شازادەی جێنشینی سعوودیە، لە میانی کۆبوونەوەی مانگی ڕابردووی لە کۆشکی سپی لەگەڵ دۆناڵد ترەمپ، پەیوەست بەم پرسە ڕایگەیاندبوو: "ئێمە دەمانەوێت ببینە بەشێک لە ڕێککەوتنەکانی ئیبراهیم، بەڵام دەبێت ڕێگەیەکی ڕوون بۆ پرسی فەڵەستین و چارەسەری دوو دەوڵەت هەبێت."