ئەندامێکی شاندی پارتی: پۆستی سەرۆککۆمار مافی پارتییە

ئاڤا نیوز

ئەندامێکی شاندی دانوستانکاری پارتی ڕایدەگەیەنێت، پۆستی سەرۆککۆمار پشکی کوردە، بەپێی ئەنجامی هەڵبژاردنیش، ئەو پۆستە مافی پارتییە.

چیرۆکی سەرەکی: دوو ڕۆژە شاندێکی باڵای پارتی دیموکراتی کوردستان لە بەغدایە، ژمارەیەک دیدار و کۆبوونەوەی لەگەڵ کەسایەتی و لایەنە سیاسییەکانی عێراق ئەنجامداوە.

لێدوانی فەرمی: فارس عیسا، ئەندامی شاندی پارتی، لە لێدوانێکی ڕۆژنامەوانیدا، گوتی، زنجیرەیەک کۆبوونەوەمان لەگەڵ سەرۆککۆمار، سەرۆکوەزیران، کوتلەکانی شیعە و سوننە، ژمارەیەک کەسایەتی دیار کە کاریگەرییان لەسەر گۆڕەپانی سیاسی هەیە، ئەنجام داوە.

لە کۆبوونەوەکان جەختمان کردەوە ڕێز لە وادە دەستوورییەکان بگیرێت. ڕێز لە شایستەی هەڵبژاردن بگیرێت و سازان لە نێوان پێکهاتەکانی کورد، سوننە و شیعە هەبێت.

پۆستی سەرۆککۆمار پشکی کوردە، بەپێی ئەنجامی هەڵبژاردن، ئەو پۆستە مافی پارتییە. ئەو کەسەی بۆ پۆستی سەرۆککۆمار کاندید دەکرێت، دەبێت نوێنەرایەتی کورد بکات و باشترە ڕێکەوتنی لەسەری بکەین.