زانکۆی سەڵاحەددین خەڵاتی ڕێزلێنان بە دکتۆر ڕەشاد میران دەبەخشێت

ئاڤا نیوز

زانکۆی سەڵاحەددین، زانای گەورەی کورد، دکتۆر ڕەشاد میران خەڵات دەکات، بەدەستهێنانی خەڵاتی "پۆشکین" ـی رووسی، لەلایەن ئەم زانایە بە دەستکەوتێکی مێژووی ناودەبات.

چیرۆکی سەرەکی: ئەمڕۆ چوارشەممە بە ئامادەبوونی سەرۆکی زانکۆ و ئەندامانی ئەنجوومەنی زانکۆ و مامۆستایان و چەندین بەرپرسی حیزبی و حکومی، زانکۆی سەڵاحەددین خەڵاتی ڕێزلێنانی بە زانای گەورەی کورد پ.د.ڕەشاد میران بەخشی.

دوای ئەوەی زانای گەورەی کورد، دکتۆر ڕەشاد میران، کۆمەڵناس و مرۆڤناسی کورد، خەڵاتی "پوشکین"ـی وەک یەکەم کورد لە ڕووسیا بەدەستهێنا، زانکۆی سەڵاحەددین، دەستکەوتەکە بە گەورە و شانازی بۆ هەموو کوردستانیان پێناسە دەکات، بە نموونەیەکی راستەقینەی زانستی و لێکۆڵینەوەی بەردەوام لە ناسنامە، مێژوو و کولتووری کوردی لە ئاستی نێودەوڵەتیدا لە قەڵەم دەدات.

زانیاریی زیاتر: خەڵاتی "پۆشکین" یەکێکە لە بەرزترین خەڵاتە فەرمییەکانی ڕووسیا لەلایەن سەرۆککۆماری ئەو وڵاتەوە پێشکەشی کەسانی لێهاتوو دەکرێت کە بەشداری بەرچاو و کاریگەریان لە بواری کولتوور، زانست، هونەر و پەرەپێدانی مرۆڤایەتی هەبێت.

ئەوەی پێویستە بیزانیت: دکتۆر ڕەشاد میران، ماوەی 28 ساڵ، مامۆستا بووە لە بەشی کۆمەڵناسی لە کۆلێژی ئەدەبیاتی زانکۆی سەڵاحەددین، زیاتر لە 30 کتێب، توێژینەوەی زانستی و وەرگێڕانی بڵاوکردووەتەوە.

باکگراوند: دکتۆر رەشاد میران، لە ساڵی 1952 لە شەقڵاوە لەدایکبووە، بڕوانامەی بەکالۆریۆسی لە زانکۆی بەغدا بەدەستهێناوە، ماستەر و دکتۆرای لە پسپۆڕی ئێتنۆگرافیا لە لینینگرادی ڕووسیا وەرگرتووە، ئەندامی دامەزرێنەری کۆمەڵەی کۆمەڵناسانی کوردستان و جێگری سەرۆکی ئەکادیمیای کوردی بووە.