لە شەش مانگدا نزیکەی 700 كلیۆگرام ماددەی هۆشبەر دەستی بەسەرداگیراوە

ئاڤا نیوز

لە شەش مانگی کۆتایی ئەمساڵ لە هەرێمی کوردستان دەیان کەس بە تۆمەتی بازرگانی کردن و بەکارهێنانی ماددە هۆشبەرەکان دەستگیرکراون، سەدان کیلۆ ماددەی هۆشبەریش دەستی بەسەرداگیراوە.

ڕاگەیێنراوی فەرمی: ئەنجوومەنی ئاسایشی هەرێمی کوردستان ڕایگەیاند، لە 1ـی حوزەیران تا 23ـی كانونی یەكەمی 2025، لەلایەن بەڕێوەبەرایەتیی نەهێشتنی ماددە هۆشبەرەكان بە هاوكاریی بەڕێوەبەرایەتییەكانی دیكەی ئاسایش دەیان كەس بە تۆمەتی كڕین و فرۆشتن و بەكارهێنانی ماددە هۆشبەرەكان كە ژمارەیەكیان بازرگانی بیانی و نێودەوڵەتی بوونە دەستگیرکراون.

بەپێی ڕاگەیێنراوی بەڕێوەبەرایەتییەكە، هەر لەو ماوەیەدا دەست گیراوە بەسەر 672 كلیۆگرام ماددەی هۆشبەر كە پێكهاتوون لە كڕیستاڵ، تلیاك، كۆكاین، مەریجوانە، هیرۆین، حەشیش و حەبی كپتاگۆن.

هاوكات دەستیش گیراوە بەسەر شەش هەزار دەرزیی ئیفیدرین و سێ هەزار و 253 شیت حەبی تڕامادۆڵ.

زانیاریی زیاتر: سەرجەم تۆمەتبارە دەستگیركراوەكان پەڕاوی لێكۆڵینەوەیان بۆ كراوەتەوە و ڕەوانەی بەردەم دادوەر كراون.

لەلایەکی دیکەوە: بەڕێوەبەرایەتییەكە بە هەماهەنگی لەگەڵ لایەنە پەیوەندیدارەكان توانیویانە لە دەرەوەی هەرێمی كوردستان دەست بەسەر بڕی 197 كیلۆگرام ماددەی هۆشبەر لە جۆری كڕیستاڵ بگرن.