گومانەکان لە کەوتنەخوارەوەی فڕۆکەکەی سوپاسالاری لیبیا زیاتر دەبن

ئاڤا نیوز

گومانەکان لە کەوتنەخوارەوەی فڕۆکەکەی سوپاسالاری لیبیا لە تورکیا زیاتر دەبن، لە کاتێکدا شاندێکی 20 کەسی تەکنیکی و سەربازی لیبیا بۆ لێکۆڵینەوە لە ڕووداوەکە گەیشتوونەتە تورکیا، دەوڵەت باخچەلی دەڵێت: کەوتنەخوارەوەی فڕۆکەکە لەو کاتەدا کە تورکیا و لیبیا هاوپەیمانیی زۆر نزیکی یەکن، جێی تێڕامانە.

چیرۆکی سەرەکی: شەوی ڕابردوو فڕۆکەیەکی سەربازیی لیبیا کە محەممەد حەداد، سوپاسالاری لیبیا و چوار گەورە بەرپرسی دیکەی ئەو وڵاتەی هەڵگرتبوو، لە ناوچەی هایمانا لە ئەنقەرەی پایتەختی تورکیا کەوتە خوارەوە و سەرجەمیان گیانیان لەدەست دا.

ئەوەی لەبارەیەوە دەگوترێت: هەرچەندە هۆکاری کەوتنەخوارەوەی فڕۆکەکە بۆ بوونی کێشەی تەکنیکی دەگەڕێنرێتەوە، بەڵام ڕۆژنامەی توركیا تودەی بڵاوی کردووەتەوە، لە لیبیا دەنگۆی ئەوە بڵاوە کە گوایە فڕۆکە لیبیاییەکە خرابێتە خوارەوە، نەک خۆی کەوتبێتە خوارەوە.

زانیاریی زیاتر: سندوقی ڕەشی فڕۆکەکە دۆزراوەتەوە و بڕیارە لە وڵاتێکی بێلایەن (واتا بە دەر لە تورکیا، لیبیا و فەرەنسا) لێی بکۆڵرێتەوە تا یەکلایی ببێتەوە هۆکاری ڕووداوەکە چی بووە.

لەلایەکی دیکەوە: داواکاری گشتیی ئەنقەرە چوار داواکاری گشتی ڕاسپاردوون بۆ لیکۆڵینەوە لە ڕووداوەکە.

ئەوەی پێویستە بیزانیت: فڕۆکەکە لەکاتی کەوتنەخوارەوەیدا پڕ بووە لە سووتەمەنی، بۆیە تەقینەوەیەکی گەورەی لێ کەوتووەتەوە.

ئەمەش بزانە: بەر لە تێکشانی فڕۆکەکە، فڕۆکەوانەکە ئاگاداری داوە لە بوونی کێشەی کارەبایی و داوای نیشتنەوەی بەپەلەی کردووە.