ئاڤا بەڵێنی نۆژەنکردنەوەی خانووی خانەوادەیەكی لێقەوماوی تەكیە دەدات

ئاڤا نیوز

ئاڤا میدیا بەڵێنی نۆژەنكردنەوەی خانووی خانەوادەیەكی هەژاریی ناحیەی تەكیە دەدات، بەو پارەیەی كە لەڕێگەی خێرخوازانی هەرێمی كوردستان لە هەڵمەتەكەی ئاڤا میدیا كۆكراوەتەوە، هاوكات سەرجەم كەلوپەل و پێداویستییەكانی نێو ماڵیشیان بۆ دابین دەكرێت.

چیرۆكی سەرەكی: تیمەكانی ئاڤا میدیا بەردەوامن لە بەدواداچوون و گەیاندنی چیرۆكە ناخهەژێنەكانی نێو كۆڵان و شەقامەكانی ناوچە زیانلێكەوتووەكانی لافاوەكەی سنووری چەمچەماڵ، لەو چوارچێوەیەشدا، ژوان قەرەداغی دەچێتە نێو ماڵێكی كەمدەرامەتی گەڕەكی ئاشتی لە ناحیەی تەكیەی كاكەمەند، كە خانووەكەیان بە كەڵكی گوزەران نایێت و كەموكوڕی زۆرە، سەرەڕای ئەوەش لافاوەكە زیانێكی زۆری بە خانووەكە گەیاندووە و سەرجەم كەلوپەلەكانی نێو ماڵەكەش لەناوچووە.

لێدوانی فەرمی: خاتوونی نێو ماڵەكە بە چاوی پڕ فرمێسكەوە باس لە دۆخی خراپی گوزەرانیان دەكات و دەڵێت، خانەوادەكەمان لە پێنج كەس پێكهاتوون و باوكم و برایەكم نەخۆشن و توانای كاركردنیان نییە، جگەلەوەش باپیرەم بەهۆی نەخۆشییەوە لەجێگە كەوتووە.

ئەو خانمە دەڵێت، "سەرەڕای خراپی دۆخی ژیانمان، لافاو هەموو كەلوپەل و پێداویستییەكانی نێو ماڵەكەی وێران كردووە و هیچ كەسیش بەهانامانەوە نەهاتووە."

چی ڕوویدا: دوای گەیاندنی ئێش و ئازاری ئەو خانەوادەیە، هەوراز گوڵپی لە پەخشی ڕاستەوخۆدا بەڵێنی دا، لەو پارەیەی كە خێرخوازان لە هەڵمەتی ئاڤا میدیا هێناویانە، خانووەكەیان بەباشترین شێوە بۆ نۆژەن دەكرێتەوە و سەرجەم كەلوپەل و پێداویستییەكانی نێو ماڵەكەشیان بۆ دابین دەكرێت.