پارێزگاری هەولێر هۆکاری هەڵوەشاندنەوەی پێشانگای بەرهەمی سووری ئاشکرا دەکات

 

 

چیرۆکی سەرەکی: بڕیاروابوو 26ـی ئەم مانگە لە پێشانگای نێودەوڵەتی هەولێر، پێشانگای بەرهەمەکانی سووری بکرێتەوە، بەڵام بەبڕیاری پارێزگاری هەولێر هەڵوەشایەوە و ئەو پێشانگەیە ناکرێتەوە.

 

لێدوانی فەرمی: ئومێد خۆشناو، پارێزگاری هەولێر، لە لێدوانێکی ڕۆژنامەوانیدا گوتی، "ئەو پێشانگایە سەرجەم ڕێککارەکانیان تەواو کردبوو، بەڵام دوای ئەوەی بینیمان لە ڕێکلامەکانیان لە سۆشیال میدیا ئاڵای عێراق و سووریایان بەیەکەوە داناوە بەبێ دانانی ئاڵای کوردستان، ئێمە ئاگادارمان کردنەوە کە ئەگەر ئەوان لە هەولێر پێشانگا بکەنەوە بەو شێوازە ڕێگایان پێنادەین."

 

ئومێد خۆشناو وتیشی "دوای ئەو دۆخەی بەسەر کوردانی ڕۆژئاوا هات، ئێمە هەڵوێستمان وەرگرت و بڕیارماندا ئەو پێشانگەیە ڕابگرین. ئەگەرچی ئەوان داوای لێبووردنیشیان کرد."

 

زانیاریی زیاتر: ئەم پێشانگایە تایبەت بوو بە ساغکردنەوەی بەرهەمە سوورییەکان لە شاری هەولێر، بەڵام بەهۆی هێرشی سوپای عەرەبی سووریا بۆ سەر هەردوو گەڕەکی ئەشرەفییە و شێخ مەقسوود، کاردانەوەی لێکەوتەوە و هاووڵاتیانی شاری هەولێر داوایان کرد ڕێگا بە کردنەوەی ئەو پێشانگایە نەدرێت.