ژمارەیەک لە گیراوانی لالەزار ئازاد کران

 

 

بەشێک لە گیراوانی لالەزار ئازاد کران و ڕادەستی کەسوکاریان کرانەوە و هێشتا 76 کەس دیکە ماون ئازاد بکرێن باوکی یەکێک لە ئازادکراوەکان دەڵێت، کوڕەکەم و 13 کەسی دیکە ئازاد کران.

 

چیرۆکی سەرەکی: ئەمڕۆ بەشێک لە گیراوانی لالەزار ئازادکران و خانەوادەی بەشێکی دیکەش لە گیراوانی لالەزار ئاگادارکراونەوە بڕۆن و مامەڵەکانیان تەواو بکەن بۆ ئەوەی گیراوەکان ئازاد بکرێن. پاسەوان، کارگوزار و کارمەندانی دیکەی لالەزار لە زیندانی ئاسایشن لێکۆڵینەوەیان لەگەڵ دەکرێت بڕیارە ئەوانەی بەشداریی شەڕەکەی هۆتێل لالەزاریان نەکردووە ئازادبکرێن.

 

لێدوانی فەرمی: بورهان ڕەشید گوڵە، سەرۆکی دەستەی پارێزەرانی لاهوور شێخ جەنگی، بە ئاڤای وت: "تا ئێستا 76 کەس لە گیراوانی لالەزار ماون ئازاد بکرێن، وابڕیارە 17 کەس لەو دەستگیرکراونە ئازاد بکرێن و کەسوکاریان ئاگادارکراونەتەوە مامەڵەی ئازادبوونی گیراوەکانیان تەواو بکەن."

 

لەلایەکی دیکەوە: باوکی یەکێک لە گیراوانی لالەزار کە نەیویست ناوی بهێنرێت بە ئاڤای گوت: "ئەمڕۆ کوڕەکەم ئازاد کرا، لەگەڵ کوڕەکەم 13 کەسی دیکە ئازادکران، کوڕەکەم و ئەوانی دیکە سەرجەمیان پێشتر لە لالەزار پاسەوان بوون."

 

باکگراوند: شەوی 22ـی ئابی 2025، دوای سێ کاتژمێر شەڕ لەنێوان هێزی کۆماندۆی یەکێتی و پاسەوانەکانی هۆتێل لالەزار، لاهوور شێخ جەنگی سەرۆکی بەرەی گەل و پۆڵادی برای لەگەڵ دەیان کارمەند و پاسەوانی لالەزار دەستگیرکران و تاوەکو ئێستا ژمارەیەک لە گیراوان لە زیندانن و ئازاد نەکراون.