دەروازەی حاجی ئۆمەران بۆ گەشتیاران: سەردانی دەروازەکەمان مەکەن

ئاڤا نیوز

 

بەهۆی بەفرێکی زۆر و بەردەوامیی بارینی بەفر و سەختی ڕێگاکان و نالەباریی کەشوهەوا، دەروازەی حاجی ئۆمەران هۆشداری بە هاووڵاتیان و گەشتیاران دەدات خۆیان بپارێزن لە سەردانیکردنی دەروازەکە و گەشتەکانیان دوابخەن.

 

وێنە گەورەکە: شەپۆلێکی بەهێزی بەفر و بارانبارین هەرێمی کوردستانی گرتووەتەوە، بەهۆیەوە ئاستەنگیی هاتووچۆی لە بەشێکی ناوچەکان دروست کردووە، بەتایبەت لە ناوچە سنوورییەکان هۆشداری دەدرێت هاووڵاتییان سەردانی نەکەن.

 

لێدوانی فەرمی: مەسعود باتێلی، سەرپەرشتیاری دەروازەی نێودەوڵەتیی حاجی ئۆمەران، بە ئاڤای گوت، "زیاتر لە 50 سانتیمەتر بەفر باریوە و ئاستەنگی بۆ هاتووچۆ دروست کردووە و تیمەکان بەردەوامن لە کردنەوەی ڕێگاکە، داوا لە هاووڵاتییان و گەشتیاران لە هەردوو دیوی هەرێمی کوردستان و ئێران دەکەین گەشتەکانیان دوابخەن، ئەگەر زۆر پێویست نەبێت سەردانی دەروازەی حاجی ئۆمەران نەکەن."

 

زانیاریی زیاتر: ڕۆژانە دەیان بارهەڵگر لە ڕێگە دەروازەی نێودەوڵەتیی حاجی ئۆمەرانەوە، کاڵا و کەلوپەل لە نێوان هەرێمی کوردستان و ئێران ئاڵوگۆڕ دەکەن، بەگوتەی سەرپەرشتیاری دەروازەی نێودەوڵەتیی حاجی ئۆمەران جمجۆڵی بازرگانی نەوەستاوە، بەڵام بەهۆی نالەباریی کەشوهەوا سست بووە.