سووریا دەروازەی یەعروبییە لەگەڵ عێراق دەکاتەوە

ئاڤا نیوز

حکومەتی سووریا ڕایگەیاند لە چەند ڕۆژی داهاتوودا دەروازەی سنووریی یەعروبییە لە پارێزگای حەسەکە، دوای 15 ساڵ لە داخرانی فەرمیی، بەڕووی جووڵەی بازرگانیی و گەشتیاراندا دەکاتەوە.

لێدوانی فەرمی: مازن عەلووش، بەڕێوەبەری پەیوەندییەکان لە دەستەی گومرگی سووریا ڕایگەیاند: "دوای تەواوبوونی تەواوی ڕێکارە کارگێڕیی و تەکنیکییەکان، دەروازەکە بەڕووی هاتوچۆدا دەکرێتەوە؛ هەماهەنگییەکانمان لەگەڵ لایەنی عێراقیی لە ئاستێکی یەکجار باڵادایە و بەم زووانە پڕۆسەکە دەستپێدەکات."

زانیاریی زیاتر: دەروازەی یەعروبییە کە هاوسنوورە لەگەڵ دەروازەی ڕەبیعەی عێراق، لە ساڵی 2011ـەوە بە فەرمیی داخرابوو و تەنها بۆ مەبەستی سەربازیی و مرۆیی سنووردار بەکاردەهێنرا.

ئەوەی پێویستە بیزانیت: پڕۆسەی کردنەوەی دەروازەکە بەشێوەیەکی کردەییی دوای ڕێککەوتنی 14-01-2026ـی نێوان هەسەدە و حکومەتی سووریا دێت، کە تێیدا کوردەکان ئەرکی پاراستنی سنوورەکانیان ڕادەستی دیمەشق کردەوە. ئێستا تیمە هونەرییەکان سەرقاڵی نوژەنکردنەوەی باڵەخانەکان و جێگیرکردنی سیستەمە گومرگییەکانن تاوەکو بە زووترین کات جووڵەی کاڵاکان و گەشتیاران دەستپێبکاتەوە، کە ئەمەش فشار لەسەر دەروازەکانی دیکەی وەک ئەلبووکەمال کەم دەکاتەوە.