بەشێکی دیکە لە موڵکەکانی شاسوار عەبدولواحید بە زیادکردنی ئاشکرا دەفرۆشرێن

ئاڤا نیوز

بۆ جاری دووەم، ژمارەیەک لە موڵکەکانی کۆمپانیای چاڤی کە شاسوار عەبدولواحید خاوەنداریەتی دەکات دەخرێنە زیاد کردنی ئاشکرا، بەهای ئەو موڵکانە بە زیاتر لە 81 ملیار و 436 ملیۆن دینار دەخەمڵێندرێن.

چیرۆکی سەرەکی: زیادکردنی ئاشکرای فرۆشتنی 13 موڵک لە موڵکەکانی شاسوار عەبدولواحید کە بڕیاربوو ڕۆژی 10ـی ئەم مانگە بەڕێوەبچێت، بۆ ئەمڕۆ 12-2-2026، درێژکرایەوە، هەر کەسێک ئارەزوو بکات ئەو موڵکانە بکڕێت، دەتوانێت بەشداری بکات.

لێدوانی فەرمی: سەرچاوەیەک لە وەزارەتی دارایی و ئابووری هەرێمی کوردستان بە ئاڤای گوت، لەسەر سکاڵای وەزارەتی کارەبای هەرێمی کوردستان و لە ڕێگەی بەڕێوەبەرایەتیی جێبەجێکردنی دووەمی سلێمانی،  13 موڵکی کۆمپانیای چاڤی کە سەرجەمیان لە کەرتی 1ـی مەلکەندی و دەباشانن، لە زیاد کردنی ئاشکرا دەفرۆشرێن.

ئەوەی پێویستە بیزانیت: دووەم جارە ئەو موڵکانەی شاسوار عەبدولواحید دەخرێنە زیادکردنی ئاشکرا، پارەی فرۆشتنی ئەو موڵکانەش بۆ وەرگرتنەوەی قەرزی کەڵەکەبووی کارەبا و کرێی گواستنەوەی تاوەرەکانی کارەبا و دانەوەی قەرزی باجی کەڵەکەبووی کۆمپانیای چاڤی دەبێت.