پێنج هەوڵی کوشتنی ئەحمەد شەرع و دوو وەزیر ئاشکرا دەکرێن

ئاڤا نیوز

ڕاپۆرتێکی نەتەوە یەکگرتووەکان کە تایبەتە بە هەڕەشەکانی داعش، ئاشکرای دەکات ساڵی ڕابردوو پێنج جار هەوڵی کوشتنی سەرۆکی سووریا و وەزیرانی دەرەوە و ناوخۆی ئەو وڵاتە دراوە، چەکدارانی داعشیش بە هەوڵەکان تۆمەتبار کراون.

چیرۆکی سەرەکی: ئەمڕۆ پێنجشەممە، نەتەوە یەکگرتووەکان ڕاپۆرتێکی بڵاوکردەوە، تێیدا هاتووە، یەکێک لە هەوڵەکان ساڵی ڕابردوو لە میانەی سەردانی ئەحمەد شەرع، سەرۆکی سووریا بۆ باکووری حەلەب و باشووری دەرعا لەلایەن گرووپێک بەناوی "سەرایان ئەنسار سوننە" هەوڵی کوشتنی دراوە، ئەم گرووپەش بە دیوێکی دیکەی داعش دادەنرێت.

زانیاریی زیاتر: هەرچەندە ڕاپۆرتەکە وردەکاریی لەبارەی هەوڵەکانی دیکە و بکەرەکانی باسنەکردووە و دیاریش نییە ئامانجی سەرەکی هێرشەکان کوشتنی خودی ئەحمەد شەرع سەرۆکی سووریا بووە یان ئامانجەکە ئەنەس خەتاب وەزیری ناوخۆ و ئەسعەد شەیبانی وەزیری دەرەوەی سووریا بووە، کە لەو گەشتانەدا یاوەری شەرع بوون، بەڵام پێی وایە ئەم هەوڵانە ئاماژەیەکی ڕوونن کە داعش تا ئێستاش توانای کردەی تیرۆرستی هەیە و هەموو بۆشاییەکی ئەمنیی لە سووریادا بۆ هێرشەکانی دەقۆزێتەوە.


زانیاریی بەدەستهاتوو: شارەزایانی نەتەوە یەکگرتووەکان دەڵێن، داعش لە سووریا بەشێوەیەکی سەرەکی هێزە ئەمنییەکان بە ئامانج دەگرێت، زیاتریش بوونی چەکداریی لە ناوچەکانی باکوور و باکووری ڕۆژهەڵاتی سووریادا هەیە و تێیدا دەتوانێت هێرش بکات.