سەرۆک بارزانی و باڵیۆزی کوێت لە عێراق هەڕەشەکانی بەردەم سەقامگیریی ناوچەکە تاوتوێ دەکەن

ئاڤا نیوز

سەرۆک بارزانی، پێشوازی لە باڵیۆزی کوێت دەکات و لە دیدارێکدا بارودۆخ و ئاڵنگاری و هەڕەشەکانی بەردەم سەقامگیریی ناوچەکە بە گشتی و  پڕۆسەی سیاسیی عێراق و هەرێمی کوردستان گفتوگۆیان لەبارەوە کرا.

چیرۆکی سەرەکی: ئەمڕۆ پێنجشەممە، لە پیرمام، سەرۆک بارزانی پێشوازی لە حەسەن محەممەد زەمان، باڵیۆزی کوێت لە عێراق کرد.

ڕاگەیێنراوی فەرمی: بارەگای بارزانی بڵاوی کردەوە، لە دیدارەکەدا عوسمان داود، کونسوڵی کوێت لە هەولێر ئامادەی بوو، باڵیۆزی کوێت سڵاو و ڕێزی شیخ مەشعەل ئەلئەحمەد ئەلجابر ئەلسەباح، ئەمیری کوێتی بە سەرۆک بارزانی گەیاند، جەختی لەسەر پەیوەندی و برایەتیی نێوان گەلی کوێت و گەلی کوردستان کردەوە و ستایشی خەبات و قوربانیدانی گەلی کوردستانی کرد بۆ گەیشتن بە ئازادی.

٠ سەرۆک بارزانی، ئاماژەی بە ئازاری هاوبەشی گەلی کوردستان و گەلی کوێت دا لە سەردەمی ڕژێمی پێشووی عێراق و جەختی لە برایەتی و قووڵکردنەوەی پەیوەندییەکانی هەردوولا کردەوە.

٠ باس لە بارودۆخ و ئالنگاری و هەڕەشەکانی بەردەم سەقامگیریی ناوچەکە بە گشتی کرا و هەروەها ڕۆشنایی خرایە سەر پڕۆسەی سیاسیی عێراق و هەرێمی کوردستان.