لە ئاکرێ کچێکی 17 ساڵان بە ڕۆنی گەرم داخ دەکرێت

ئاڤا نیوز

ژنێک بەشێوەیەکی دڕندانە کچێکی تەمەن 17 ساڵ ئەشکەنجە دەدات، ڕۆنی سوورەوەکراوی بەسەردا کردووە و بەشێکی جەستەی سووتاندووە. ڕووداوەکە لە گەڕەکی ڕووناهی ڕوویداوە لە ئاکرێ.

چیرۆکی سەرەکی: چیرۆکەکە لێرەوە دەستپێدەکات؛ حەوت ساڵ لەمەوبەر کچێک باوکی کۆچی دوایی کردووە، دایکیشی نەخۆش بووە و باری دارایی باش نەبووە، بۆیە نەیتوانیوە بەخێوی بکات، بۆیە خاڵێکیان بردوویەتییە لای خۆیان و بەخێوی کردووە.

چی ڕووی دا؟ بەڵام چەند ڕۆژێک لەمەوبەر کێشەیەک دروست بووە، ئەو ژن و پیاوەی کچەکەیان لای خۆیان داڵدە دابوو کە ئێستا گەورە بووە و بووەتە 17 ساڵ، منداڵێکی ساوایان هەبووە،  لای کچەکە جێی دەهێڵن و دەچنە دەرەوە.

- لەو کاتەدا منداڵە بچووکەکە دەست لە سۆپا دەدات و کەمێک دەستی دەسووتیت. کاتێک ژن و پیاوەکە دەگەڕێنەوە و دۆخی منداڵەکەیان دەبینن، کچە 17 ساڵانەکە تۆمەتبار دەکەن.

ئەوەی پێویستە بیزانیت: پاشان ژنی ماڵەکە، واتا خاڵۆژنی کچە 17 ساڵەکە، بێویژدانانە ڕۆن داغ دەکات و بەسەریدا دەکات، بەمەش بەشێکی زۆری جەستەی کچەکە سووتاوە.

زانیاریی زیاتر: ئەو ژنەی تاوانەکەی کردووە دەستگیرکراوە و لێکۆڵینەوەش لە مێردەکەی دەکرێت.

ئەوەی لەبارەیەوە دەگوترێت: پۆلیسی ئاکرێ دەڵێت: ئێستا پەڕاوی لێکۆڵینەوە بۆ ئەم ڕووداوە کراوەتەوە، بەڵام ئامادە نەبوو وردەکاریی زیاتر لەسەر دەستگیرکراوان و ڕێکارە یاساییەکان بخاتە ڕوو.