ئەمریکا و ئێران بۆ گەڕی دووەمی گفتوگۆ ئەتۆمییەکان لە جنێڤ کۆ دەبنەوە

ئاڤا نیوز

بڕیارە سێشەممەی داهاتوو، 17-2-2026، شاندێکی باڵای ئەمریکا و ئێران لە شاری جنێڤی سویسرا کۆببنەوە. ئەمە دەبێتە گەڕی دووەمی دانوستانەکانی نێوانیان [دوای جەنگی 12 ڕۆژە] بە مەبەستی گەیشتن بە ڕێککەوتنێکی نوێ و ڕێگریگرتن لە هەڵگیرسانی جەنگ لە ناوچەکەدا.

زانیاریی بەدەستهاتوو: بەگوێرەی ئاژانسی ئاکسیۆسی ئەمریکی، شاندی ئەمریکی بە سەرۆکایەتیی جارید کوشنەر، زاوا و ڕاوێژکاری باڵای ترەمپ و ستیڤ ویتکۆف، نێردەی کۆشکی سپی دەبێت. لە بەرامبەردا، عەباس عێراقچی، وەزیری دەرەوەی ئێران سەرۆکایەتیی شاندی وڵاتەکەی دەکات. هەروەها بەدر بوسەعیدی، وەزیری دەرەوەی عومان وەک نێوەندگیر لە کۆبوونەوەکەدا ئامادە دەبێت.

زانیاریی زیاتر: پێش دەستپێکردنی ئەم گەڕە، هەوڵە دیپلۆماسییەکان لە پشت پەردەوە چڕکراونەتەوە. ویتکۆف پەیامێکی گرنگی لە ڕێگەی وەزیری دەرەوەی عومانەوە بۆ ئێرانییەکان ناردووە و پەیامەکە گەیشتووەتە دەستی عەلی لاریجانی، سکرتێری ئەنجومەنی باڵای ئاسایشی نیشتمانی ئێران لە کاتی سەردانەکەیدا بۆ مەسقەت.

لەلایەکی دیکە: لەگەڵ هەوڵە دیپلۆماسییەکان، دۆناڵد ترەمپ، سەرۆکی ئەمریکا، گوشارە سەربازییەکانیشی زیاد کردووە و فەرمانی ناردنی دووەم کەشتی فڕۆکەهەڵگری بۆ ناوچەی کەنداو دەرکردووە.

- هاوکات ترەمپ هەڕەشەی گۆڕینی ڕژێمی لە ئێران کردووە و بە میدیاکانی گوتووە "پێدەچێت گۆڕینی ڕژێمی ئێران باشترین شت بێت کە ڕووبدات، بۆ ماوەی 47 ساڵە ئەوان تەنیا قسە دەکەن، لەم نێوەندەدا، ئێمە گیانی زۆرێکمان لەدەستداوە لەکاتێکدا ئەوان خەریکی قسەکردن بوون."