سەرۆکوەزیرانی بەریتانیا: دەبێت کەمتر پشت بە ئەمریکا ببەستین

ئاڤا نیوز

سەرۆکوەزیرانی بەریتانیا، ئەورووپا بە زەبەلاحێکی نوستوو وەسف دەکات و پێی وایە دەبێت لەمەودوا کەمتر پشت بە ئەمریکا ببەستن.

لێدوانی فەرمی: نووسینگەی سەرۆکوەزیرانی بەریتانیا ڕایگەیاند، کیێر ستارمەر لە کۆنفرانسی ئاسایشی میونشندا گوتارێک سەبارەت بە دۆخی گشتی ئەوروپا پێشکەش دەکات و بڕیارە لە گوتارەکەشیدا ئەورووپا بە ''زەبەلاحێکی نوستوو'' وەسف بکات.

- بەپێی ڕاگەیێنراوەکەی نووسینەگەی سەرۆکوەزیرانی بەریتانیا، ستارمەر لە دۆخی ئەورووپا ڕازی نییە و پێی وایە لە ڕادە بەدەر پشت بە ئەمریکا دەبەستن، بڕیاریشە ئەمڕۆ لە كۆنفرانسی ئاسایشی میونشن باس لە دۆخی بەرگری و سەربازی ئەورووپا بکات و داوا لە وڵاتانی کیشوەرەکە بکات بەوەی کەمتر پشت بە ئەمریکا ببەستن.

زانیاریی زیاتر: ستارمەر، پێی وایە ئەوروپا دەبێت بەرەو ''ناتۆیەکی ئەوروپیتر'' هەنگاو بهنێت و داوای کردووە ئەورووپییەكان سەربەخۆییەکی زیاتر بۆ پرسی ئاسایشی ئەورووپا  بەدەستبهێنن، بەڵام جەختیش لەوە دەکاتەوە کە ئەم هەنگاوە بە واتای کشانەوەی ئەمریکا نایەت، بەڵکو هەوڵێکی بۆ ڕێکخستنەوەی پەیوەندییەکانی نێوان هەردوولا.

- دۆناڵد ترەمپ، سەرۆکی ئەمریکا پێشتر چەندین جار ڕایگەیاندووە کە وڵاتانی ئەوروپا بە پێی پیویست پشکی خۆیان لە بەرگری هاوبەشدا نادەن، ئاماژەی بەوەش داوە کە دەبێت لەمەودوا وڵاتانی ئەوروپی بودجەیەکی زیاتر بۆ کەرتی سەربازی ناتۆ دابین بکەن.

باکگراوند: هەفتەی پێشوویش حکومەتی بەریتانیا ڕایگەیاند، لەمساڵدا زیاتر لە 400 ملیۆن پاوەند لە کڕینی چەک بۆ ناتۆ خەرجکراوە، ستارمەر لە نێوخۆی وڵاتەکەیدا لەلایەن پارتەکانی ئۆپۆزسیۆنەوە لە ژێر گوشارێکی زۆردایە سەبارەت بە تێچووە سەربازییەکان، بەڵام سەرۆکوەزیرانی بەریتانیا پێی وایە ئاسایشی وڵاتەکەی بەندە بە ئەوروپاوە.