ئەمریکا لە دەستگیرکردنی مادورۆ ژیریی دەستکردی بەکارهێناوە

ئاڤا نیوز

سوپای ئەمریکا مۆدێلی ژیریی دەستکردی "کڵۆد" (Claude)ـی لە کاتی ئۆپراسیۆنی گرتنی نیکۆلاس مادۆرۆ لە ڤەنزوێلا بەکار هێناوە، ئەمەش بووەتە هۆی دروستبوونی کێشەیەکی توند لەنێوان پنتاگۆن و کۆمپانیای ئانترۆپیک.

چیرۆکی سەرەکی: سەرچاوەکان ئاشکرایان کردووە کە ژیریی دەستکردی "کڵۆد" لە کاتی ئۆپراسیۆنی گرتنی نیکۆلاس مادۆرۆ لە ڤەنزوێلا تەنیا لە ئامادەکاریدا بەکار نەهاتووە، بەڵکو لە ناو جەرگەی ئۆپراسیۆنە چالاکەکەدا بۆ شیکردنەوەی وێنە مانگە دەستکردەکان و داتا هەواڵگرییەکان بەکار هێنراوە. لەو هێرشەدا هیچ ئەمریکییەک نەکوژرا، بەڵام کوبا و ڤەنزوێلا ڕایانگەیاند کە دەیان سەربازیان کوژراون.

زانیاریی زیاتر: ئێستا وەزارەتی بەرگریی ئەمریکا (پنتاگۆن) بە سەرپەرشتیی پیت هێگسێس، دەیەوێت بە خێرایی ژیریی دەستکرد لە هەموو بوارە سەربازییەکاندا جێگیر بکات تاوەکو لە چین پێش بکەوێت. هەرچەندە کۆمپانیاکانی وەک گۆگڵ و OpenAI و xAI گرێبەستیان لەگەڵ پنتاگۆن هەیە، بەڵام تاوەکو ئێستا تەنیا سیستەمی ئانترۆپیک لەسەر پلاتفۆرمە نهێنی و پۆلێنکراوەکانی سوپا بەردەستە.

لێدوانی فەرمی: بەرپرسێکی باڵای ئیدارەی تره‌مپ بە پێگەی "ئەکسیۆس"ـی ڕاگەیاندووە: ئانترۆپیک پرسیاری کردووە ئایا سۆفتوێرەکەیان لە گرتنی مادۆرۆدا بەکار هاتووە، و ئاماژەیان بەوە داوە ئەگەر بەکار هاتبێت ڕەنگە پەسەندی نەکەن؛ هەر کۆمپانیایەک سەرکەوتنی ئۆپراسیۆنەکانی سەربازانی ئێمە بخاتە مەترسییەوە، پێویستە لە هاوبەشیمان لەگەڵیاندا بچینەوە.

لەلایەکی دیکەوە: وتەبێژی ئانترۆپیک وتی: هەر بەکارهێنانێکی کڵۆد دەبێت پابەند بێت بە سیاسەتەکانمان کە چۆنیەتیی بڵاوکردنەوەی مۆدێلەکە ڕێکدەخات.

ئەوەی پێویستە بیزانیت: کۆمپانیای ئانترۆپیک (Anthropic) لەلایەن لێکۆڵەرانی پێشووی OpenAI دامەزراوە و خۆی وەک پارێزەری "ئەخلاق و سەلامەتی" لە ژیریی دەستکرددا دەناسێنێت. پەیوەندیی ئەم کۆمپانیایە لەگەڵ پنتاگۆن لە ڕێگەی کۆمپانیای "پالانتیر" (Palantir)ـەوە بەهێزتر بوو کە گەورەترین بەڵێندەری سۆفتوێری سوپای ئەمریکایە.