لە هەولێر بكوژێک و لە سلێمانی دزێک دەستگیركران

ئاڤا نیوز

ئاسایشی هەولێر تۆمەتبارێکی دەستگیرکرد کە بە ماتۆڕسکیل لە کەسێکی داوە و ڕایكردووە، پاشان ئەو كەسە گیانی لەدەستداوە و شۆفێرەکە ڕایکردووە، لە سلێمانیش کەسێک دەستگیرکراوە چوار ئۆتۆمبێلی دزیوە و تەقەی لەمەفرەزەکانی ئاسایش کردووە.

ڕاگەیێنراوی فەرمی: ئاسایشی هەولێر ڕایگەیاند: لەڕێکكەوتی 15-4-2024، لە شەقامی (150م) تەرمی هاووڵاتییەک بەناوی (دیار عومەر خدر) دۆزرایەوە، داوی گەیشتنی هێزەکانیان دەرکەوتووە بە ڕووداوی هاتووچۆ گیانی لەدەستداوە و لەشوێنی ڕووداوەکە بەجێهێڵراوە.

زانیاریی زیاتر: هێزەکانی ئاسایش دەستیان بە بەدواداچوون کردووە و توانیویانە تۆمەتبارەکە بەناوی (ک،ح،ن) دەستگیر بکەن کە بە ماتۆڕسکیل لەو هاووڵاتییەی داوە و هەڵهاتووە.

لە لایەکی دیکەوە: بەڕێوەبەرایەتی ئاسایشی ڕۆژئاوای سلێمانی، بڵاویکردەوە: تۆمەتبارێکی داواکراوی هەڵاتوو لە یاسا و لەدایکبووی 2000 بەناوی (پ.ف.ح) لە قەزای چەمچەماڵ دەستگیرکردووە، کە چەندین پێشینەی تاوانی دزیکردنی ئۆتۆمبێل و هەڵکوتانە سەر هاووڵاتیان و سەرانە وەرگرتن و تەقەکردن لەمەفرەزەکانی ئاسایشی هەبووە.

ئەمەش بزانە: تۆمەتبارەكە لەسەر ڕێگای ( ناحیەی شۆڕش و سەنگاو و قەزای کەلار )بەزەبری چەک چەندین ئۆتۆمبێلی لەهاوڵاتیان سەندووە و بووەتە هۆی دروستکردنی ترس و دڵەڕاوکێ لای هاوڵاتیان و ڕێبوارانی سنوورەکە، دوای دەستگیرکردنی سەرجەم ئۆتۆمبێلە دزراوەکان ڕادەستی خاوەکانیان کرانەوە. ئاسایشی ڕۆژئاوای سلێمانی ئەمەی گوتووە.