دەرچووانی  پزیشكی و ته‌ندروستی زانکۆ و پەیمانگەکانی هەرێمی کوردستان دادەمەزرێن

ئاڤا نیوز

ناوی دەرچووانی كۆمه‌ڵه‌ی پزیشكی و ته‌ندروستی زانکۆ و پەیمانگەکانی هەرێمی کوردستان بۆ دادەمەزراندن ڕەوانەی بەغدا کراون و هەفتەی داهاتووش دەرگای پێشکەشکردنی فۆڕم دەکرێتەوە.

لێدوانی فەرمی: بەختیار حاجی، بەڕێوەبەری گشتیی كاروباری په‌یوه‌ندییه‌كان و به‌دواداچوون لە نوێنەرایەتیی حکومەتی هەرێمی کوردستان لە بەغدا بە ئاڤا نیوزی ڕاگەیاند: هەفتەی داهاتوو لینکی دامەزراندن بۆ دەرچوانی زانکۆ و پەیمانگەکانی هەرێمی کوردستان بۆ دانیشتوانی پارێزگاكانی دەرەوەی ئیدارەی هەرێمی كوردستان کارا دەکرێت، دەرچووانی بەشە ته‌ندروستی و پزیشکییەکان دەتوانن لە ڕێگەی ئەلیکترۆنییەوە ناوەکانیان پێشکەش بکەن و دابمەزرێن.

زانیاریی زیاتر: داتا و لیستەکان دراونەتە وەزارەتی تەندروستیی عێراق، هەر کەسێک ناوی لە لیستەکەدا بێت و فۆڕمەکەی پێشکەش بکات وەردەگیرێت.

ئەوەی پێویستە بیزانیت: بەگوێرەی لیستەکە  دوو هەزار و 579 کەسە و دەرچووی زانکۆ و پەیمانگەکانی هەرێمی کوردستان و پارێزگاكانی ڕێكنه‌خراو له‌ هه‌رێمی كوردستان، لە وەزارەتی تەندروستی عێراق دادەمه‌زرێن.