د.بەرهەم ساڵح: لە پەراوێزی دیداری سلێمانی كۆبوونەوەی گرنگ بەڕێوەچوون

ئاڤا نیوز

سەرۆکی دەستەی ئەمینداری زانکۆی ئەمریکی – سلێمانی ڕایگەیاند، لە پەراوێزی دیداری سلێمانی کۆبوونەوەی گرنگ لەبارەی دۆخی ئێستای هەرێمی کوردستان بەڕێوەچوون.

وێنە گەورەکە: ئەمڕۆ کارەکانی هەشتەمین دیداری سلێمانی لە زانکۆی ئەمریکی لەژێر ناونیشانی"ململانێکانی ڕۆژهەڵاتی ناوەڕاست"  کۆتایی هاتن کە بۆ ماوەی دوو ڕۆژ بەردەوام بوو.

لێدوانی فەرمی: د. بەرهەم ساڵح، سەرۆکی دەستەی ئەمینداری زانکۆی ئەمریکی – سلێمانی بە ئاڤا نیوزی گەت: لە دیداری سلێمانییدا کۆمەڵێک باسی گرنگ لەبارەی پەیوەندییەکانی هەرێمی کوردستان و بەغدا هەبوون، لە پەراوێزی دیدارەکەش سەرکردە سیاسییەکان کۆبوونەوەی گرنگییان لەسەر دۆخی ئێستای هەرێمی کوردستان و پەیوەندییەکانی هەولێر و بەغدا کردووە.

زانیاریی زیاتر: لە کۆبوونەوەکاندا گفتوگۆی جددی لەبارەی ئەو کێشانە کراوە بە تایبەت پرسی مووچەی مووچەخۆرانی هەرێمی کوردستان.

ئەوەی پێویستە بیزانیت: لە پرسیاری ڕۆژنامەنووساندا لەبارەی باسکردنی هەڵبژاردنەکانی هەرێمی کوردستان بەرهەم ساڵح وەڵامیانی نەدایەوە.

 

زانیاریی بەدەستهاتوو: ئاڤا زانیویەتی لە پەراوێزی هەشتەمین دیداری سلێمانی نێچیرڤان بارزانی سەرۆکی هەرێمی کوردستان، فایەق زێدان سەرۆکی ئەنجوومەنی باڵای دادوەری و بافڵ تاڵەبانی  سەرۆکی یەکێتیی، کۆبوونەوەیەکی داخراویان کردووە تایبەت بە پرسی هەڵبژاردنی پەرلەمانی کوردستان و بڕیارەکانی دادگەی فیدراڵی عێراق و چۆنێتی پێداچوونەوەی.