بەنداوی دەربەندیخان کەمتر لە 30 سانتیمەتری ماوە پڕبێت

ئاڤا نیوز

ئەمساڵ ڕێژەیەکی زۆر باران لە هەرێمی كوردستان و ناوچەی دەربەندیخانیش باریوە، بەوهۆیەوە بەنداوی دەربەندیخان ئاستی ئاوی بەشێوەیەكی بەرچاو بەرزبووەتەوە و 30 سانتیمەتری ماوە پڕ ببێت.

وێنە گەورەکە: بەنداوی دەربەندیخان توانای گلدانەوەی سێ ملیار مەتر سێجا ئاوی هەیە و ئاو بۆ بەشێك لە دانیشتووانی هەرێمی كوردستان دابین دەكات.

لێدوانی فەرمی: سامان ئیسماعیل، بەڕێوەبەری بەنداوی دەربەندیخان بە ئاڤا نیوزی ڕاگەیاند: بەنداوی دەربەندیخان کەمتر لە 30 سانتیمەتری ماوە بۆ ئەوەی پڕبێت و سەرڕێژ بێت، بەنداوەکە پشتی بەستووە بە ئاوی باران، 30٪ ئاوی بەنداوەکە پشتی بە ئاوی سنووری ناوخۆی هەرێم بەستووە و 70٪ی دەرەوەی سنوور.

باکگراوند: بەنداوی دەربەندیخان، دەکەوێتە قەزای دەربەندیخان و نزیکەی 67 کیلۆمەتری باشووری ڕۆژهەڵاتی پارێزگای سلێمانی، لە ساڵی 1961ەوە لەسەر ڕووباری سیروان دروستکراوە، تا ئێستا نزیکەی 12 جار پڕ بووە و چوار جاریش سەرڕێژی کردووە.