حکومەتی هەرێمی کوردستان بەردەوامی بە پڕۆژەکانی ڕانیە دەدات

ئاڤا نیوز 

 

لێپرسراوی ڕاگەیاندنی سەرۆکایەتیی شارەوانی ڕانیە ئاشکرای کرد، پڕۆژە ستراتیژییەکانی ڕانیە بەردەوامن؛ لە کۆنکرێتکردنی ڕێگەوبان تاوەکو دروستکردنی پردی دەربەندی ڕانیە کە لە ئایندەیەکی نزیکدا بەڕووی گەشتیاراندا دەکرێتەوە.

 

لێدوانی فەرمی: بەشدار حەمید، لێپرسراوی ڕاگەیاندنی سەرۆکایەتیی شارەوانی ڕانیە بۆ ئاڤا نیوز گوتی: تەنیا لە ماوەیەکی کەمدا توانراوە پڕۆژەیەکی زۆر لە ڕانیە دەستپێبکرێت و هەندێکیشیان تەواو بکرێن.

 

شێوازی جێبەجێکردن: لە ماوەیەکی کەمدا توانراوە کۆنکرێتی دوو گەڕەی قەڵاتی نوێ تەواوبکرێن و جێبەجێکردنی پرۆژەی ڕێگەسازی گەرەکی ماکۆک کە لە قۆناغەکانی تەواوبوونیدایە، لەگەڵ نۆژەنکردنەوەی ڕێگەی کۆمەڵگەی فەرمانبەران، تەواوی پڕۆژەکان زیاتر لە 150 ملیۆن دیناریان بۆ تەرخانکراوە.

 

ژمارەکان وادەڵێن: گوژمەی 60 ملیۆن و 689 هەزار دینار دیاریکراوە بۆ تەواوکردنی پرۆژەی كۆنكرێتكردنی شەقام لە ناوچەی پیشەسازی ڕانیە کە لە 80%ـی تەواوکراوە، ئەمە جگە لەوەی زیاتر لە 10 ملیار دینار تەرخانکراوە بۆ جووتسایدکردن و فراوانکردنی شەقامی سەرەکی ناوبازاڕ و دەیان پڕۆژەی دیکە.

 

ئەوەی پێویستە بیزانیت: یەکێک لە گەورەترین پڕۆژەکانیش لە ناوچەکە بریتییە لە دەربەندی ڕانیە، کە پڕۆژەکە نزیکەی 13 ملیار دیناری بۆ تەرخانکراوە و کارەکانی تەواوبوون و لە ئایندەیەکی نزیکدا بەڕووی گەشتیاراندا دەکرێتەوە.