وەزارەتی ئەوقاف: بەزووترین کات عومرەکاران لە سعودیە دەگەڕێنینەوە

ئاڤا دیجیتاڵ

بەهۆی ئەو سزایەی ئەمریکا بەسەر کۆمپانیای فلای بەغدادی سەپاندووە، 250 عومرەکاری هەرێمی کوردستان لە سعودیە گیریانخواردووە،  بەڕێوەبەرایەتیی حەج و عومرەش بەڵێندەدات بەزووترین کات بیانگەڕێننەوە.

چیرۆکە سەرەکییەکە: دوای بڕیارەکەی وەزارەتی گەنجینەی ئەمەریکا، کە  22ی ئەم مانگە بەتۆمەتی هاوکاریکردنی سوپای پاسدارانی ئێران و گرووپە چەکدارەکان لە عێراق، سووریا و لوبنان، سزای بەسەر کۆمپانیای فڵای بەغداد سەپاند،  سەدان عومرەکار کە لەڕێگەی کۆمپانیاکەوە بۆ سعودیە گەشتیان کردووە و دەبووایە هەفتەی رابردوو بگەڕێنەوە هەرێمی کوردستان، بەڵام بەهۆی سزاکەوە نەیانتوانی لە فڕۆکەخانەکانی هەولێر و سلێمانی دابەزن.

لێدوانی فەرمی: کاروان ستوونی، گوتەبێژی بەڕێوەبەرایەتیی گشتی حەج و عومرەی هەرێمی کوردستان بە ئاڤا میدیای راگەیاند: ژمارەی عومرەکاران  405 کەس بوو، لەدوای هەوڵەکانمان و هەماهەنگی لەگەڵ دەستەی باڵای حەج و عومرەی عێراق، توانیمان دوێنێ هەینی 155 عومرەکار بگەڕێنینەوە هەرێمی کوردستان.

زانیاری زیاتر: ئێستا نزیکەی 250 عومرەکار لە شاری مەدینە ماونەتەوە و نەیانتوانیوە بگەڕێنەوە بۆ هەرێمی کوردستان، لەوێ خواردن و شوێنی مانەوەیان بۆ دابینکراوە. کاروانی ستوونی ئاماژەی بۆ ئەوە کرد لەگەڵ سعودیە لەگفتوگۆدان و هەوڵدەدەن رۆژی یەکشەممە یان دووشەممە لەڕێگەی هێڵێکی دیکەی ئاسمانییەوە عومرەکاران بگەڕێننەوە.

باکگراوند: رۆژی  22ی ئەم مانگە وەزارەتی گەنجینەی ئەمەریکا بەتۆمەتی هاوکاریکردنی سوپای پاسدارانی ئێران و گرووپە چەکدارەکان لە عێراق، سووریا و لوبنان، سزای بەسەر کۆمپانیای هێڵی ئاسمانی فڵای بەغداد سەپاند.

 وەزارەتی گەنجینەی ئەمریکا تۆمەتی گواستنەوەی چەکداران، چەک و پارەی بۆ سووریا و لوبنان بۆ پاڵپشتیکردنی گرووپە میلیشیکانی نزیک لە ئێرانی داوەتە پاڵ کۆمپانیاکە، لەبەرامبەریشدا کۆمپانیای فڵای بەغداد تۆمەتەکانی رەتکردەوە و سەرجەم گەشتەکانیشی ڕاگرت.