سەرۆکوەزیران بارزانی: هێرشکردنە سەر ژێرخانی ئابووریی هەرێمی کوردستان زیانی بۆ هەموو هاووڵاتیانی عێراق هەیە

ئاڤا نیوز

سەرۆکوەزیران بارزانی هێرشەکەی سەر کێڵگەی غازی کۆرمۆر بە هێرشێکی "تیرۆریستی" ناودەبات و دووپاتی دەکاتەوە کە هێرشکردنە سەر ژێرخانی ئابووریی هەرێمی کوردستان زیانی بۆ هەموو هاووڵاتیانی عێراق هەیە. 

 

ئەوەی پێویستە بیزانیت: ڕۆژی پێنجشەممە 02-05-2024 سەرۆکوەزیران مەسرور بارزانی پێشوازی لە زیاد عەلی فازڵ، وەزیری کارەبای عێراقی فیدراڵ کرد.

 

لێدوانی فەرمی: سەرۆکوەزیران بارزانی ئاماژەی بە هێرشە تیرۆریستییەکەی چەند ڕۆژی ڕابردووی سەر کێڵگەی غازی کۆرمۆر کرد و دووپاتی کردەوە کە هێرشکردنە سەر ژێرخانی ئابووریى هەرێمی کوردستان، زیانی بۆ هەموو هاووڵاتیانی عێراق هەیە و پێویستە کۆتایی بەو پەلامارانە بهێنرێت و ڕێگەی لێ بگیرێت.

 

بابەتی ستراتیژی: سەرۆکوەزیران بارزانی ئامادەیی هەرێمی کوردستانی بۆ هەر هاریکاری و هاوئاهەنگییەکی پێویست لەگەڵ حکومەتی فیدراڵ دەربڕی لەپێناو پەرەپێدانی ژێرخانی وزە، کە پێویستە ئەنجامدانی هەر کار و پرۆژەیەکیش تەنیا لە ڕێگەی دامەزراوە فەرمییەکانی حکومەتی هەرێمی کوردستانەوە بێت.

 

بۆچوونی لایەنی بەرامبەر: وەزیری کارەبای عێراق، ستایشی هاوئاهەنگی و پەیوەنديی باشی نێوان هەردوو وەزارەتی فیدراڵ و هەرێمی کرد، بە ئاراستەی پێشکەشکردنی باشترین خزمەتگوزاری بۆ هاووڵاتیان کە ئامانجی هاوبەشی هەردوولایە.