وەزیری كارەبا: پێشنیازی دانانی سیستەمی بەرگريی ئاسمانی بۆ كێڵگەی كۆرمۆر کراوە

ئاڤا نیوز

دوای هێرشە درۆنییەکەی سەر کێڵگەی کۆرمۆر، حکومەتی عێراق پێشنیازی دانانی سیستەمی بەرگريی ئاسمانی بۆ كێڵگەکە کردووە.

وێنە گەورەکە: زیاد عەلی فازل، وەزیری كارەبای عێراق سەردانی هەرێمی کوردستانی کرد و دوای کۆبوونەوە لەگەڵ سەرۆکوەزیران بارزانی، لەگەڵ وەزیری کارەبا و بە وەکالەتی سامانە سرووشتییەکان کۆبووەوە. پرسی سەرەكی هێرشەكەی سەر كێڵگەی كۆرمۆر بوو.

لێدوانی فەرمی: کەمال محەممەد، وەزیری كارەبا و سامانە سرووشتییەکانی حکومەتی هەرێمی کوردستان بە وەكالەت، ڕایگەیاند: لەڕووی زەمینییەوە حکومەتی هەرێمی کوردستان کەمتەرخەمی لە پاراستنی کێڵگەی کۆرمۆردا نەکردووە، بەڵام پاراستنی لە ئاسمانەوە بەرپرسیارێتییەکەی لە ئەستۆی بەغدایە.

ئەوەی پێویستە بیزانیت:ئەو لیژنەیەی لەسەر ڕاسپارەدی سوودانی بۆ سەردانکردنی کێڵگەکە پێکهێنرابوو، پێشنیازیان کردووە، لە رێگەی سیستەمی بەرگریی ئاسمانییەوە کێڵگەی کۆرمۆر بپارێزرێت. کەمال محەممەد وای گوت.

باكگراوند: ڕۆژی هەینی 26-04-2024، یەکێک لە کۆگاکانی کێڵگەی کۆرمۆر بە درۆن کرایە ئامانج، بە هۆیەوە چوار کارمەند گیانیان لەدەست دا و هەشت کارمەندی دیکەش بریندار بوون.