بەڕێوەبەری کشتوکاڵی هەولێر: داخستنی بازگەی مەخموور لەلایەن هێزە عێڕاقییەکانەوە سیاسییە

ئاڤا نیوز

هێزە عێراقییەکان بازگەی مەخمووریان بەڕووی کاڵا و بەرهەمە کشتوکاڵییەکانی هەرێمی کوردستاندا داخست، ئەمەش بووەتە هۆی پەککەوتنی جووڵەی بازرگانی و دروستبوونی ئاستەنگی بۆ هاووڵاتیان.

چیرۆکی سەرەکی: درەنگانی شەوی ڕابردوو هێزە عێراقییەکان بازگەی مەخمووریان داخست، ئەمەش ئاستەنگییەکی زۆری هاتووچۆی دروست کردووە.

٠ هێزەکان ڕێگە بە تێپەڕبوونی هیچ کاڵایەک نادەن لە هەولێرەوە بەرەو مەخموور، تەنانەت هاووڵاتیانی مەخمووریش بۆ کڕینی پێداویستیی ڕۆژانەیان ڕووبەڕووی ڕێگری بوونەتەوە. ئەو هێزانە دەڵێن: فەرمانەکەیان لە بەغداوە بۆ هاتووە. لە بەرامبەردا شۆفێر، جووتیار و کاسبکارانی ناوچەکە دەستیان بە خۆپیشاندان کردووە و جەخت دەکەنەوە تا کێشەکە چارەسەر نەبێت لە دەربڕینی ناڕەزایەتی بەردەوام دەبن.

لێدوانی فەرمی: هێمن سەید موراد، بەڕێوەبەری کشتوکاڵی هەولێر بە ئاڤای ڕاگەیاند: ئەم بڕیارە سیاسییە نەک ئیداری و ساڵانە دووبارە دەبێتەوە؛ ئامانج لێی لاوازکردنی جووڵەی بازرگانیی هەرێمی کوردستان و دابڕاندنی مەخموورە لە هەولێر، تاوەکو هاووڵاتیان ناچار بکرێن تەنیا پەنا بۆ مووسڵ ببەن.

لەلایەکی دیکەوە: شۆفێرانی بارهەڵگریش دەڵێن: وەزارەتی کشتوکاڵی عێراق بڕیارێکی نادروستی داوە و بەو بیانووەوە ڕێگری لە هەموو جۆرە کەلوپەل و خواردەمەنییەک دەگرن.

ئەوەی پێویستە بیزانیت: قەزای مەخموور لە دوای ڕووداوەکانی 16ـی ئۆکتۆبەری 2017ـەوە، دۆخێکی ئەمنیی تایبەتی هەیە و هێزە فیدراڵییەکانی عێراق تێیدا باڵادەستن، لە ساڵانی ڕابردوودا بەتایبەت لە وەرزەکانی پێگەیشتنی بەرهەمی کشتوکاڵی، چەندین جار بەغدا ڕێگری لە گواستنەوەی بەرهەمەکانی هەرێمی کوردستان کردووە بۆ ناوچەکانی دیکەی عێراق، ئەمەش وەک بەشێک لە ململانێیەکی بەردەوام لەسەر داهات و کۆنتڕۆڵی دەروازە ناوخۆییەکان دەبینرێت.