بۆ ڕێگری لە هێرشی ئەمریکا، ئێران هەنگاوێکی نوێ دەگرێتەبەر

ئاڤا نیوز

عەلی لاریجانی، سکرتێری ئەنجوومەنی باڵای ئاسایشی نیشتمانیی ئێران، بە پەیامێکی بەپەلە گەیشتە مەسقەت بۆ تاوتوێکردنی دۆسیەی ئەتۆمی و دوورخستنەوەی مەترسیی هێرشی ئەمریکا.

چیرۆکی سەرەکی: بڕیار وایە ئەمڕۆ سێشەممە 10-2-2026، عەلی لاریجانی، سەرۆکی پێشووی پەرلەمان و سکرتێری ئێستای ئەنجوومەنی باڵای ئاسایشی نیشتمانی، سەردانی عومان بکات. لاریجانی چەندین کۆبوونەوەی ئاستبەرز ئەنجام دەدات و ئامانجی سەرەکیی ڕێگریکردنە لە هێرشێکی ئەگەریی ئەمریکا.

لێدوانی فەرمی: عەباس عێراقچی، وەزیری دەرەوەی ئێران، جەختی لەوە کردەوە:وڵاتەکەی پابەند دەبێت بە مافی خۆی بۆ پیتاندنی یۆرانیۆم؛ ئەمە خاڵێکی سەرەکیی ناکۆکییەکانە و تاران لەو مافە پاشەکشە ناکات.

ئەوەی لەبارەیەوە دەگوترێت: میدیاکان ئاماژە بەوە دەکەن کە لاریجانی وەڵامی وڵاتەکەی بۆ خولی یەکەمی گفتوگۆ ناڕاستەوخۆکانی نێوان ئێران و ئەمریکای پێیە و لەگەڵ سوڵتان هەیسەم بن تاریق و بەدر ئەلبوسەعیدی کۆدەبێتەوە.

زانیاریی زیاتر: بڕیارە ڕۆژی چوارشەممە، بنیامین نەتانیاهۆ لە کۆشکی سپی لەگەڵ سەرۆک دۆناڵد ترەمپ کۆببێتەوە، ئەم سەردانە هەفتەیەک پێش وادەی خۆی ئەنجام دەدرێت، ئامانجی سەرەکیی کاریگەری خستنە سەر ئەو گفتوگۆیە ناڕاستەوخۆیانەیە کە لە نێوان تاران و واشنتن لە عومان بەڕێوە دەچن.