ئاسایشی هەولێر بکوژێک و هاوکارەکانیان لە مەلا ئۆمەر دەستگیر دەکات

ئاڤا نیوز

ئاسایشی هەولێر سێ کەس بە تۆمەتی کوشتن و هاوکاریکردنی بکوژ دەستگیر دەکات، کە پەیوەندییان بە ڕووداوێکی کوشتنی چەند ڕۆژێک لەمەوبەری کۆمەڵگەی مەلا ئۆمەرەوە هەیە.

ئەوەی پێویستە بیزانیت: ڕۆژی 29-4-2024، لە کۆمەڵگەی مەلائۆمەری سەر بە شاری هەولێر هاووڵاتییەکی خەڵکی تورکیا بەناوی (ئیسماعیل) کوژرا.

ڕاگەیێنراوی فەرمی: ئاسایشی هەولێر ڕایگەیاند: دوای بەدواداچوون و بە فەرمانی دادوەری لێکۆڵینەوە لەلایەن بەڕێوەبەرایەتی ئاسایشی بازگەکان کەسی بکوژ بەناوی (م، خ،ت) کە خەلکی وڵاتی تورکیایە و هاوکارێکی دیکەی بەناوی (ج،ئـ ،ئـ) دەستگیر کران.

زانیاریی زیاتر: دوو تۆمەتبارەکە بەنیازبوون هەڵبێن بۆ دەرەوەی شاری هەولێر، تۆمەتباری سێیەمیش بەناوی (ج،م،ن) کە بەهامان شێوە هاوکاری بکوژ بووە بۆ هەڵهاتنی، لەلایەن هێزەکانی ئاسایشەوە لەناوشاری هەولێر دەستگیر کراوە.

گۆشەیەکی دیکە: تۆمەتباری سەرەکی (م،خ،ت) لە لێکۆڵینەوەکاندا دانی بەوەدا ناوە کە پێشینەی تاوانی هەیە و لە وڵاتی تورکیاش تاوانێکی دیکەی کوشتنی ئەنجامداوە.