وەزارەتی كارەبا: پێدانی كارەبا ئاسایی بووەتەوە

ئاڤا نیوز

 

گوتەبێژی وەزارەتی كارەبای حكومەتی هەرێمی كوردستان ڕایگەیاند، پێدانی كارەبا ئاسایی بووەتەوە، دوابەدوای ئەوەی بەرهەمهێنانی غاز لە کێڵگەی کۆرمۆر بەتەواوەتی دەستیپێکردووەتەوە.

وێنە گەورەکە: کێڵگەی غازی کۆرمۆر ڕۆژانە چوار هەزار و 200 مێگاوات کارەبا بەرهەم دەهێنێت، لەو بڕە دوو هەزار و 800 مێگاواتی بۆ هەرێمی کوردستان و ئەوەیشی دەمێنێتەوە ڕەوانەی هەردوو پارێزگای کەرکووک و مووسڵ دەکرێت.

لێدوانی فەرمی: ئومێد ئەحمەد، گوتەبێژی وەزارەتی کارەبا ڕایگەیاند: "دۆخی کارەبا ئاسایی بووەتەوە، کاتەکانی پێدانی کارەبا لە هەندێک شوێن لە نێوان 18 - 19 کاتژمێر نزیک بووەتەوە و کەمترین پێدانیش 15 - 16 کاتژمێر بووە".

باکگراوند: کاتژمێر 06:45 خولەکی ئێوارەی هەینی 26-04-2024، یەکێک لە کۆگاکانی هەڵگرتنی غازی شل لە کێڵگەی کۆرمۆر بە درۆن کرایە ئامانج، بە هۆیەوە چوار کارمەند گیانیان لەدەست دا، هەشتی دیکەش بریندار بوون.